رحلة الي المحلة.

احب احكيلكم يا جماعة عن الرحلة دي ؛ مش عاوزكم بس تقولوا ايه الكلام الفارغ ده ؛ او تقولوا احنا مالنا متروح المحلة ولا حتى كوالا لامبور .
صدقوني لو كنت رحت كوالا لامبور كانت حاجة اسهل. عموما اسمعوا للآخر بس .. مش السفر فيه سبع فوايد ؛ دي بقى كانت سفريه فيها مليون فايده مختلفين عن السبعة بتوع اي سفريه تانيه.
اولا يوم السفر يبتدي بعد صلاة الجمعة ؛ اخدت اهل بيتي و طلعت على المحور عشان نوصل للطريق الدائري و منه نمشي في الزراعي. طبعا ده عادي ؛ الي مش عادي بقى اني وانا ماشي على المحور في المنطقة الي فيها الاصلاحات اشوف غراب طاير طالع من تحت صور المحور لفووووق طبعا كتير حيقولوا ايه الغريب في كده!!! الغريب يا جماعة انه مرة واحدة لقيته بيهجم على العربيه انا قلت ده غراب عبيط بينتحر و فجأه طااااااااااااااااااااااااااااااااااااااااااخ راح خابط في الازاز الامامي للعربيه ؛ طبعا مش قادر اوصفلكم الذهول الي انا كنت فيه لانه مطلعش غراب بس طلعت طوبه حجمها محترم و تقريبا واحد ابن حلاااال حدفها ؛ شكله كده كان سباق مين يوصل الطوبه فوق المحور ؛ وواضح انه كان فاطر كويس فالطوبه مش بس وصلت للمحور دي طارت فوق منه و كمان كسرتلي الازاز بتاع العربيه. طبعا نتعلم من كده حاجتين مهمين اولا و انت ماشي على المحور ياريت ما تتخضش لو طوبه جت في عرابيتك دشدشتلك اي حاجه في العربيه ؛ ثانيا اذا حصلك الموقف ده متحولش انك تلمس فرامل العربيه لانك لو عملت كده اي عربيه وراك حتخبطك و مش حترسي بس على ازاز مكسور.
يعني طبعا تفهموا من الكلام ده اني فضلت ماشي زي مانا بالرغم من الازاز الي اتكسر و ده ستر من عند ربنا. و الحمد لله ان الازاز نفسه سيكوريت ففضل ماسك نفسه و موقعش علينا.
المهم وصلت للطريق الدائري و كمان وصلت للطريق الزراعي و مشيت مشيت مشيت مشيت ؛ لحد ما خفت ان المحلة تعدي و اوصل اسكندريه و انا مش حاسس. طبعا الزراعي طريق سريع فمينفعش اسأل اي عربيه ماشيه جنبي ؛ المهم و على احد الكباري حركة المرور اتعطلت و ده كان شئ جميل لاني قدرت اسأل اول نص نقل كان ماشي جنبي و طبعا جاوبني بكل ثقة "الحق انزل يمين من الفتحه الجايه".
و بما اني انسان مطيع سمعت كلامه و نزلت يمين و انا مش عارف يمين ده بيودي فين لانه مش مكتوب اصلا على المنزل ؛ بس بعد ما نزلت لقيت اليافطة بتقول ان المنزل ده يودي على المنصورة.
قلت ماشي ماهو المفروض ان المنصورة و المحلة جنب بعض. نسيت اقول لكم حاجه قبل الكبري الي انا نزلت منه ده كان فيه يافطة بتقول ان طنطا فاضل عليها 50 كيلو ؛ خليكوا فاكرين دي عشان حتنفعكم بعد كده.
المهم فضلت ماشي في طريق المنصورة حوالي ساعة و مرة واحدة الطريق خلص و بقى فيه طريقين يمين و شمال و فيه يافطة مرور مش مكتوب عليها حاجة بس مرسوم عليها سهم متجه يمين ؛ مش عارف ليه رحت انا رايح شمال و الحمد لله مطلعش غلط و مشيت في الطريق و فعلا لقيت يافطه تانيه بتقول المنصورة قلت ميمنعش اسأل عشان اطمئن ؛ فوقفت جنب واحد ماشي في الشارع على رجله و قلتله " هي المحله طريقها ازاي؟" فقالي و هو مستغرب " ادخل من الفتحة الجايه شمال على ميت غمر" طبعا انا قلت اكيد هو مفهمش السؤال و سيبته و مشيت. انا مالي و مال ميت غمر.
قبل المنصورة تقريبا ب 500 متر قابلني كبري كبير عديت من تحته و على مدخل المنصورة قلت اسأل بقى عسكري المرور عشان كده بقى خلاص وصلت تقريبا للمحلة فملوش لازمة اتوه.
سألته فقالي " يااااااااه انت لازم تلف تاني و ترجع تطلع الكبري و تمشي على طول لحد كبري علوي تاني تطلعه اوعى تمشي جنبه و لما تنزل منه حتلاقي مدخل المحله"
قلت كويس مش بقلوكم خلاص وصلنا.
لفيت و رجعت طلعت الكبري و فضلت ماااااااااااااشي مااااااااااااااشي لدرجة اني قلت مفيش كبري علوي تاني ولا ايه المهم بعد 30 دقيقة وصلت للكبري التاني ؛ طلعت عليه لانه اصلا مينفعش مطلعش عليه لانه مفيش طريق جنبه ؛ المهم نزلت منه لقيت الطريق مكمل و مفيش مدخل للمحلة و بعدين لقيت نفسي قدام مفترق طرق ؛ حوالي 5 طرق مختلفة على ميدان صغير فوقيه كبري . وقفت و نزلت اسأل ؛ فواحد ابن حلال قلي روح شمال مع الكبري و خليك ماشي طوالي حتوصل المحلة . مشيت زي ما قلي بعد 20 دقيقة في الطريق ده لقيت يافطة بتقول "طنطا 58 كيلو" فاكرين لما كانت طنطا 50 كيلو ؛ حد فيكم يقدر يوصف احساسي في اللحظة دي؟؟؟
المهم فضلت ماشي وصلت لمنطقة اسمها محلة ابو علي قلت كويس اهه كله محلة صحيح الطريق كان مكسر بس احسن من مفيش و شويه و لقيت نقطة شرطة المحلة الكبرى ؛ طبعا كنت في منتهى السعادة و بعدين مرة واحدة لقيت الطريق بيلف يمين و شكله بيتحسن و بينضف و على شمالي كاسرين حته في الجزيرة يعني عشان لو كنت عاوز تفضل ماشي في الشارع المكسر ممكن تحاول تعدي من الفتحة دي. فطبعا الاختار الطبيعي اني مشيت في الطريق النظيف ؛ و كان شكله من بعيد بيلف فقلت حيلف و يدخلني البلد تاني ؛ بعد 10 دقايق من الطريق ده لقيت البلد بتبعد و مفيش اي حاااجه باينه في الافق ممكن تدخلني على البلد. قررت اني الف و ارجع ادخل من الفتحة المكسورة و امشي في الطريق المكسر و مش حسأل حد خااااااااااالص ؛ و فعلا لفيت و بعد 50 متر تقريبا لقيت يافطة مرور مكسورة وواقعة على الارض حاولت اقرأ المكتوب و نجحت الحمد لله لانها كانت بتقول "<-- المحلة الكبرى" فطبعا اول شارع يمين قابلني دخلته و طلع صح هو بتاع المحلة. ياااااااااااااااااااااااااااااااااااااااااااااااااااااااااااااه وصلت الرحلة دي اخدت مني 3 ساعات و 45 دقيقة و المفروض انها على اكثر تقدير تاخد ساعة و نصف. نتعلم منها كمان اننا منسألش حد على الطريق لو عاوزين نوصل بسرعة و طبعا طبعا ننسى اننا نعتمد على اي يافطة مرور عشان توصلنا لأي حته. نسيت اقلكم حاجة ؛ فاكرين الراجل الي قالي اروح شمال لميت غمر ؛ طلع عنده حق و فعلا كان ده طريق اسهل و اقصر.