مجرد أفكار هي عبارة عن فكرة قد نتمكن من خلالها من عرض افكارنا و بعض ما يدور في صدورنا على انفسنا و على من يسوقه حظه العثر الى دخول هذه الفكرة.
ارجو التعليق بلطف
قال لي اُحبها ؛ فهل تُحبني!!
قلت له لم تخلق كي تُحَب بل خلقت لتُعذّب قال لي اُحسها ؛ فهل تُحسني !!
قلت له لم تخلق كي تُحَس بل كي تُهمَل قال لي اذكرها ؛ فهل تذكرني!!
قلت له لم تخلق كي تذكرك بل كي تنساك قال لي ....
قلت له اصمت الم تتعلم الم تتألم الم تكتفي من الجراح لم يبق فيك مكان لم تشوهه الاحزان لم يبق فيك مكان لم تعتصره الآلام كم من مرة انتظرتها جريت لها عانقتها في خيالك ثم نظرت حولك فلم تجدها كفاك يا قلبي ما لاقيت فانت لم تخلق كي يكون لك بيت اتحبها فلتحبها ما حييت !!!
معظم من يعيش في بلدنا هذه الايام يعاني من حالة احباط شديدة ؛ اما لانه لا يستطيع الزواج او لا يستطيع تحقيق طموحه في العمل او لا يكفيه مرتبه و لا يستطيع ان يكمل الشهر حتى آخره ؛ اسباب كثيرة تحيط بنا و تجعلنا محبطين جدا جدا.
و انا واحد من هذا الشعب المحبط و لن ادعي انني اكثرهم احباطا او اقلهم و لكنني اقاوم ؛ احيانا انجح في مقاومة هذه الحالة و احمد الله على ما رزقني و احاول ان اشغل نفسي بما لدي من نعم و احيانا تكون المسببات اقوى من مجرد المحاولة فافشل و اهوي في حالة الاحباط حتى ينتابني الكثير من آلام الجسد.
طبعا الكل يتساءل لماذا احكي لكم هذا الكلام ؛ احكيه لاني اخاطب كل محبط و كل حزين ؛ كل شخص يشعر انه مظلوم او فاشل ؛ كل من لا يستطيع ان يحمد ربه على نعمه بصدق و باخلاص ؛ اخاطب نفسي و اخاطبكم.
سوف اتكلم معكم كما فعلت في موضوعي السابق بالصور ؛ و لا ادعي اني مؤلف او جامع لهذه الصور ؛ و لكنها اتتني في ايميل بعنوان افضل ايميل لعام 2008 ؛ و هو فعلا كذلك الافضل. و لكني سوف اعلق على الصور باستخدام التعليق الاصلي او تعليق خاص بي كي اشارككم احساسي بهذه الصور؛ دعونا نبدأ معركة ضد الاحباط و اليأس ....
يا ترى حاسس ان الدنيا مقفلة في وشك وصعبة و مفيش حاجة بتيجي بالساهل و بيطلع روحك عشان تحقق اي حاجة في حياتك
تفتكر دول حاسين بايه!!!!
طب مرتبك قليل و مش بيكفيك و عاوز تشتري موبايل جديد و مش قادر و حاسس ان زمايلك في الشغل معاهم موبايلات احسن منك
تفتكر دي ممكن تكون بتتمنى ايه في اللحظة دي!!!!
وحيد و مش لاقي حد تكلمه و اصحابك مش فهمينك و اهلك ظلمينك و عمالين يؤمروك اعمل ده و متعملش ده...
افتكر ان العسكري ده نفسه في حد يتكلم جنبه مش يهبهب
لا لا خلااااص يأست مش حكمل مش قادر ؛ كل محاولاتي للتحسين من وضعي المالي و الاجتماعي تبوؤ بالفشل ؛ يأست من محاولة ان اجد من يفهمني او يشعر بي ؛ يأست من ......
هو الراجل ده ميأسش ليه و لسه عايش و بيكافح !!!!
مطحون في الشغل و بتذاكر و حاسس انك مش قادر تقف على رجلك ؛ طلبات البيت كتير و مفيش غيرك ؛ لازم تنزل و تجيبلهم كل حاجة كأنك الشغال بتاعهم ...
ايه ده ؛ ازاي الجدع ده بيعمل كده ؛ ده احنا فرافير جنبه
عاوز تغير عربيتك اصل التكييف تعبان ؛ لا لا المواصلات زحمة و الدنيا حر و بتقف ساعة عشان تلاقي حاجه تركبها او بتضطر تركب 3 مواصلات عشان توصل البيت...
يا ترى الي انت عايشه ولا الي دول عايشينه ؛ ايهم اصعب!!!
المجتمع ظلمك و اهلك و اصحابك ؛ كلهم بيتحكموا فيك و كلهم تعبينك ...
اهدى كده و فكر؛ الست دي المجتمع عمل فيها ايه؟؟؟؟؟
ايه رأيكم !!! معلش بعض الصور صعبة بس بجد مؤثرة ؛ و هو ده المطلوب بس يا رب يكون التأثير ايجابي ؛ و لو لسه مش مقتنع و محتاج تشوف حاجات كمان كمل باقي الصور و لكن انا مش حعلق ..
في النهايه احب اقول حاجة ؛ كلنا عندنا مشاكل و كل واحد شايف ان مشكلته هي اصعب مشكلة ؛ الموضوع ده عشان نفتكر ان فيه مشاكل اصعب من مشاكلنا و ليس للتقليل من حجم او تأثير هذه المشاكل على مشاعرنا و لكن ارجوا انه يساعد كل واحد انه يقاوم و يعرف انه غرقان في النعم بالرغم من وجود مشاكل و ان في رب اسمه الكريم لازم نحمده و نعتمد عليه انه هو الي حيفرجها.
يااااااااااااااااااااااااا رب
ملحوظة: لو الموضوع جاب معاك نتيجة بلاش تبخل على حد بيه و ابعتهوله يمكن تاخد ثوابه.
الموضوع ده موضوع فلسفي بدرجة كبيرة .. جالي امتى وحي الفلسفة ده .. جالي وانا قاعد اقرأ كتاب بس معجبنيش .. مش حقلكم عليه عشان لو حد فيكم بيقرأة ميتأثرش برأيي. الكاتب كان بيتكلم عن الشعب المصري و نظام الطبقية .. هو الراجل بصراحة مقلش حاجة على هذا النظام و احتمال يكون قال .. انا مش عارف عشان مكملتش قراءة .. بس لما وصلت للكلمة دي نزل علي وحي الفلسفة.
طول عمرنا نعرف ان في طبقية ؛ فينا ناس مش فاهماها و فينا مش بيحبها و اتربى على انه يكره الموضوع ده و يتحمس و يقول كلنا ولاد تسعة و فينا مقتنع بيه و فاكر نفسه انضف من الناس كلها او يكون فاكر نفسه اسوأ من الناس كلها. الظريف ان كل الافكار دي حتعتمد على الطبقة الي الشخص فيها.
محدش يعترض ؛ كمل قراءة للآخر يمكن توافقني في الرأي.
انا مش عارف انا من اي طبقة .. و انا مش مع طبقة ضد طبقة .. و لكن انا بجد معترض على رفض مبدأ الطبقات .. لأني شايف ان حياتنا كلها طبقات .. ازااااي؟؟؟؟
اولا ربنا لما خلقنا خلقنا طبقات .. خلق فينا الغني و خلق فينا الفقير .. ده نوع من الطبقية .. خلق فينا المثقف و خلق فينا الجاهل و ده نوع تاني من الطبقية .. لما خلق السموات خلقهم سبع سموات يعني طبقات .. لما خلق الارض خلقها طبقات سواء تكلمنا عنها على انها طبقات الارض المختلفة او تكلمنا على السبع اراض التي خلقها الله ؛ الخلاصة انها طبقات. و الامثلة ممكن تكون كتيرة بس هي في الآخر طبقات . يبقى منرفضش مبدأ الطبقات لأننا مهما رفضناه حيفضل موجود.
النقطة المهمه هي لماذا اتخلقنا طبقات؟!! كان مقصود حاجة معينة من الحكايه دي؟!!! .. الاجابة طبعا مقصود و فيه حكمة رهيبة .. ثبت بكل المقاييس العلمية و المعملية ان نظام الطبقات هو افضل نظام لتبادل المنفعه بين مختلف الطبقات واسرع و سيلة لتسيير الامور .. فمثلا في اي شركة اذا ما تم ظبط الهيكل الاداري فيها بشكل مدروس فانها تنجح بشكل كبير لان استراتيجية العمل تأتي من الطبقة الادارية العليا و يتم تحليلها و تنفيذها بسهولة بواسطة الطبقات الاقل في الشركة ؛ والعكس يظهر ايضا في تقارير المتابعة انها تسير بشكل عكسي من الطبقات الاقل للطبقات الادارية الاعلى بسهولة و بشكل فني صحيح.
و لكن مفيش حد احسن من حد الا بالعمل .. يعني السماء الاولى ليست اقل شأنا من السماء السابعة كل السموات فيها ملائكة و فيها من الرسل و الانبياء ؛ يعني كلها احلى من بعضها. و ايضا طبقات الارض ؛ لو فكرنا ؛ هي الطبقة الاولى احسن من السابعة ؛ لا ؛ الاولى تراااااااااب فيها املاح و الاعمق صخور فيها معادن ثمينة يعني احسن من الاولى و لكن الاولى هي الي ممكن نزرع فيها و نعييش عليها و لكن الاعمق مش ممكن نزرع فيها ؛ يبقى مفيهمش احسن و اوحش .
يعني الخلاصة الطبقات موجودة و مش ممكن نلغيها .. لكن مفيش طبقة احسن من طبقة و لا طبقة اوحش من طبقة .. كل الطبقات مهمة لسير الحياة و تكوين مجتمع سليم نفسيا. فمفيش داعي ان الي موجود في طبقة عالية انه يفتكر نفسه مهم .. و لا فيه داعي ان الي في طبقة اقل انه يحس بالاهمال او انه ملوش لازمة.
يا جماعة كله زي بعضه كله مفيد لبعض و كله في الآخر نهايتة واحدة .. ده حتى البامبرز طبقات و كله بييجي فيه اللامؤاخذة . يعني محدش يزعل.
وصلني على الايميل بتاعي اليوم مجموعة الصور دي... فحبيت اشارككم بيها و هو بالمرة نعتبرها استراحة صغيرة من الكتابة ... عارفين احنا دايما بنبحث على الصور في الكتب قبل ما نقرأ الكتاب اصلا ...
تعالو نتفرج مع بعض
ده اجمل بيت في العالم بتاع رونالدينهو ... الي ميعرفش مين ده ميسألش
و ده اجمل كوبري في العالم ... الظريف ان اليابانيين هما الي بنيينه ... شوف قصيريين بس عفاريت
و نتجه الآن لكندا عشان نشوف منظر شلالات نياجرا الي تعتبر من اجمل شلالات العالم..
نسيب المباني و الشلالات بقى و نتجه للبني ادمين يا ترى فيهم حاجه جميلة!!!!!
الصغنن الجميل ده باكستاني و اخد جائزة اجمل طفل في العالم ... بزمتكم مش يتاكل اكل
و عشان البنات ميزعلوش تبقى دي اجمل بنت في العالم
وطبعا مينفعش نفوت العيون و جمال العيون ... انا مش عارف البنت دي لما تكبر حتعمل ايه في الي حيبصلها
و طبعا زي مشفتم الجمال في البني ادمين لحد سن معين ... بعد كده صعب نلاقي حاجة جميلة للاسف ...
نسيب البني ادمين و نلقي نظرة على عالم الحيوان..
انا ححط الصورة دي عشان انا عارف في شخص معين حتعجبه جدا ... دي صورة اجمل حصان و طبعا حيكون حصان عربي
و نسيب الحيوان و نرجع للطبيعة الي اكيد فيها حاجات اجمل من اننا نوصفها بالجمال
الصورة دي مش حعلق عليها حسيبكم تتفرجوا عليها و كل واحد يشوف فيها الي هو عايزه
ارجوا ان الصور تعجبكم ... و معلش واضح اني رغاي .. يعني محطتش الصور و سكت انما لازم اتكلم ...
