لما كنا صغيرين

لما كنا صغيرين
كنا لما بنتوجع
يدوبك ننزل دمعتين
و نلقا ايد تطبطب
و ايد تزغزغ
و يخلص الوجع
بضحكتين
لما كنا صغيرين
كنا بنخاف من حجات بسيطه
 حجات عبيطه
بنخاف لو النور قطع
ونجري نولع شمعتين
في كل اوضه شمعه...
اصل بيتنا كان اوضتين
نقعد حاضنين بعض
ولو قمنا نبقا.. 
شابكين الايدين
نطلع من اوضه لأوضه
نجري و نهرب من خيالنا
من وحش رسمناه بس
في خيالنا
ونرجع في غمضه عين
لما كنا صغيرين
كنا بنحب
ببراءة بنظرة عين
وضحكة صغيرة 
تجمع ما بين قلبين
اجيب لعبتي 
و تجيبي لعبتك
و نلعب باللعبتين
ولو اتنافسنا 
تجيبي كراستك 
تقولي ..
انا اخدت نجمه
اقولك...
وانا اخدت نجمتين
ميهمناش بكره
يهمنا حناكل ايه..
بعد دقيقتين
مكنش يجي في بالنا
ان الدنيا مش اوضتين
وان احساس الامان
والدلع و الحنان
حيتقلب لخوف وقسوة
وحنين
او ان الغدر و الخيانه
حيبقو صفات البني ادمين
وان الحب الي كان
حياة بين قلبين
حيبقا سبب دمع العين
لو كنا نعرف
كنا وقفنا الدقايق 
قبل ما تمر الساعات
وتضيع مننا السنين
 مكناش اتولدنا
او على الاقل 
كنا فضلنا صغيرين

حكاية

ومنين تبتدي الحكايه
من نظرة
من ضحكه
ولا من لمسة اديها لاديًه
من همسه
من كلمه
لما قالتلي انت روحي وعنيًه
لو قلت اني فرحت
وللسما طرت
او قلت قلبي دق
وبعد سنين القسوه
رجع للحب رق
ده كله حيبقا شويه
رجعت تاني اتنفس
وبعد ما كنت بمشي
بقيت في خطواتي بتنطط
في نطه للسحاب بلمس
و لو زقيت السحاب يمشي
مبقتش في مشاعري متلخبط
وفيوم قالتلي
انت ليه بقيت مزقطط
و اتغيرت ملامحك
ده حتى قميصك الاسود
الي كان بالاسود مخطط
رميته ولبست قميص الوانه
تشبه سعدتك
من يوم ما قلتيلي بحبك
و ايامي ملامحها اتغيرت
ساعاتها و دقايقها حتى ريحتها 
اتبدلت
بس انا مقلتلكش بحبك
ازاي!!
عنيكي قالتلي بحبك
لمسة اديكي 
ولا دقات قلبك 
كانت بتقول بحبك
بس انا مقلتلكش.. بحبك
ومنين تبتدي الحكايه
لما قتل المشاعر
يبقا دايما هو النهايه
لما حرق القلوب
عند الناس هوايه
يبقا مينفعش تبتدي الحكايه