الثلاثاء، 24 مارس 2009

رحلة الى بلجيكا - حلقة 2

السلام عليكم

وقفنا المرة الي فاتت عند الصدمة العظيمة الي جتلي لما وصلت الهلتون المزعوم ... وصلت و سألت على الراجل بس مكنش فيه حد بالاسم ده عندهم... المهم طبعا بعد 40 دقيقة مشي مع العلم ان العبد لله مش رفيع يعني ؛ واضح ان شكلي صعب على الراجل و وقف يفكر و فجأه عينيه نورت و راح قايل بولولوم ؛ طبعا البولولوم دي كانوا كلمتين بالفرنساوي و انا علاقتي باللغة دي علاقة اقل ما توصف به انها زي العلاقة بين القمر و طبق المحشي ؛ و طبعا كان رد فعلي على الكلمتين دول طبيعي جدا جدا فتحت بوئي و تنحت ؛ و طبعا الراجل مكنش محتاج حد يشرحله ان الانسان الي واقف قدامه مش فاهم حاجه فرجع و حاول انه يقول نفس الكلام بالانجليزي ؛ طلع بقى بيقول اييييييه

"يكنش صاحبك ده موجود في الهلتون التاني الي في وسط البلد" ... شوفتوا "يكنش" دي ... و محدش يسألني الهالي بالانجليزي ازاي ... عموما مش ده المهم المهم انه طلع فيه هلتون تاااااني و محدش قالي ... قلتله يمكن ؛ راح رافع سماعة التليفون و طلب رقم و قال شوية كلام كتييير باللغة الفرنسية المدلعة دي ؛ طبعا انا فهمت انه بيسأل على الراجل لانه قال اسمه ... مش محتاجة مجهود دي...و بعدين ابتسم و قفل و قالي ان الراجل موجود عندهم... يا سلااااااااام كان خبر جمييييل ... سألته اوصل هناك ازاي بقى!!! راح مطلعلي خريطة اكبر من الي معايا و شاورلي على نقطة في الطرف الآخر من الكون و قالي "ده الهلتون التاني".

انا : جميل اوصل هناك ازاي حضرتك يعني؟

الراجل : خد عربيه توصلك او اركب المترو لانه مشوار كبيييير

انا : ايوة مشوار كبير اد ايه يعني

الراجل : هو انت حتمشي؟

انا : طبعا هو في حل تاني

الراجل : اوففف دا طويل يعني حوالي 40 او 45 دقيقة مشي

انا : شكرا ؛ ممكن آخد الخريطة دي عشان احسن من الي معايا

الراجل : طبعا ؛ اتفضل.

طلعت من الباب و احب اذكر اني قعدت في الموقف السابق حوالي 15 دقيقة طلعت بعديهم من باب الفندق لقيت درجة الحرارة وصلت للصفر؛ حتقولولي عرفت ازاي ؛ ببساطة جدا منخيري كانت حتقع مني من السقعة.
رجعت نفس المشوار الي مشيته لا الم زاد ولا الم نقص ؛ الغريبة اني كنت ماشي رجليي وجعاني ؛ لا مش بس رجلي كانت وجعاني على ما اذكر ان شعر رجلي كان وجعني بس الغريبة ان صدري مكنش بيحرقني زي ما بيحصل لما في بتنا اقوم اجيب ميه من المطبخ ؛ كنت بتنفس زي البني ادمين عادي خالص مش زي ما بيحصل في بلدنا يعني ؛ محتاج تمشي معاك انبوبة اكسجين ؛ و الحاجة التانية الي لفتت نظري وانا ماشي ؛ انتوا عارفين طبعا في الدول الاوروبيه عادي جدا ان يكون فيه احترام لقوانين المرور و خصوصا عند علامات عبور المشاه ؛ طبعا فيه بعض الشوارع الصغيرة ممكن البني ادمين يعدوا منها بس من غير علامات عبور مشاه كل ده عادي ؛ فانا ماشي مش مركز من التعب المهم رحت معدي الشارع من غير ما ابص ؛ لا انا نعدتش ان بس نزلت رجل واحدة من على الرصيف و حتى منزلتش التانيه و فوجئت بعربيه كانت ماشية و الي راكب وقف بالعربيه ؛ طبعا انا اتكسفت من نفسي و قلت بس الراجل حينزل يقلي كلمتين بولولوم برده بس اكيد حيكونوا شتيمه ؛ لقيت الراجل واقف سااااااااكت و مستني الشخص الي هو انا انه يعدي ؛ طبعا انا اخدتلي 10 ثواني عشان استوعب الاحترام ده و عديت الشارع ؛ و بعدها ميت بفكر لو كنت سرحت كده و انا ماشي في شارع في مصر و كان في عربية معدية كان حصل حاجة من اتنين يا دسني يا وقف شتم اليوم اليوم الي اتعلمت انا فيه المشي و فكرت انزل الشارع اقرفه فيه . 
المهم بعد مشي مدة 40 دقيقة تانيه وصلت عند نقطة البداية يعني عند الفندق بتاعي . قلت تماااااام انا قبل ما اتحرك و اعمل جدع اشوف حد اسأله ؛  لقيت واحد شكله محترم مشيت نحيته عشان اسأله راخ بصصلي و هو مخضوض و طلع يجري ؛ والله انا نفسي اتخضيت ؛ بس قلت ما علينا انا اشوف مطعم  و اسأل حد من المطعم على الاقل مش حا يجري ؛ اول باب مطعم قبلني دخلت بس مطلعش مطعم .. طلع بار بس كنت دخلت خلاص ؛ المهم قلت اسأل بقى و شوف رحت نحيت الست الي بتحط المشاريب هههههه ؛ سالتها مفهمتش مني حاجه ؛ تقريبا عشان كنت فايق ههههههه ؛ راحت نادتلي واحد ؛ لقيت واحد جي نحيتي بس هو كان باصص في نحيه مختلفة عن الي انا كنت واقف فيها المهم وصل عندي بالسلامه ؛ و سألته راح ماسك الخريطة و فاتحها و شرحلي شرح مفصل و دقيق للغاية و بعد ما خلص راح باصص قوي في الخريطة و قالي ؛ نو نو ؛ احنا ماسكين الخريطة بالمقلوب و راح قالب الخريطة و عاد الشرح تاني ؛ المهم شكرته و طلعت اجري من المكان ده و رحت ماشي عكس الطريق الي مشيت فيه اول مرة ؛ فضلت ماشي حوالي 20 دقيقه و الحمد لله في النهاية وصلت الهلتون التاني و دخلت.
رحت للرسبشن و سألت : لو سمحتي فيه واحد اسمه " " عندكم
البنت بتبص في الكمبيوتر : لا
قلتلها ؛ غرفه 223
قالتلي : مممممممممم لا
في هذه اللحظة نسيت اني لازم اتكلم انجليزي قلتلها : وحيات امك ركزي معايا انا مش ناقص مساطيل
قالتلي : وات ؟؟؟؟
قلتلها : الراجل لسه مكلمكم من الهلتون التاني و سألك و قلتيله انه موجود
قالتلي : اووووه يس يس و قعدت تدور على حاجه
قلتلها : انت بتدوري على ايه؟؟
قالتلي : سوري بدور علة مفتاح الغرفة عشان تطلع
انا بقى كنت حتجنن ؛ العالم دي مججانين ولا ايه الموضوع سالتها : اطلع فين؟
قالتلي : هو مش حضرتك حاجز باسم " " و عاوز تطلع غرفتك
قلتلها :لا " " ده صاحبي و هو عندكم و عاوزه ينزلي
قالتلي : آآآآآآآآآه ؛ و ادتني التليفون عشان اكلمه 
كلمته و قعدت على الكنبه و بسسسسسسسس مكنتش قادر انزل رجلي على الارض تاني
كفايه كده على الحلقة دي ... الخلقة الجاية بقى احكيلكم لما نزلنا مع بعض انا و الراجل ده عشان ندور على حاجه ناكلها حصلنا ايه
حاجة اخيرة احب بس تعرفوها
وانا قاعد مستنيه فتحت الخريطة عشان اتفرج على المشوار الي مشيته كان مجموع عدد الكيلو مترات الي مشيتهم 4 رايح و 4 راجع و 3 رايح في الاتجاه العكسي يعني 11 كيلو 
الحمد لله اني قاعد على الكنبة بكتب الحكايه دي

السبت، 21 مارس 2009

رحلة الى بلجيكا - حلقة 1

السلام عليكم و رحمة الله و بركاته
طبعا في ناس اول ما حتشوف العنوان حتفكر ان الموضوع موضوع منظرة و حيقولوا هو كاتب الكلام ده عشان يقولنا انه راح بلجيكا و كده .. شوفوا ده رأيكم بس لو كملتم للآخر حتعرفوا انا كاتب الموضوع ده ليه.
اولا حبا مني اني اشارككم معايا في اليومين دول فانا ححكيلكم الي حصل معايا و ضمنيا حتعرفوا باقي الاسباب.
اولا دي كانت رحلة عمل من النوع التقيل جدا ؛ يعني محدش يفتكر اني كنت طالع اتفسح و ان كنت اتمنى انها كانت تكون فسحه .. الطيارة طلعت الساعة 10 صباحا من مطار القاهرة القديم الي عاوز اقلكم انه احسن حالا من مطار القاهرة الجديد بمراااااااااحل.  في اول مراحل ركوب الطيارة كل شئ كان جميل و هي طيارة مصر للطيران اير بص اول ما بدلأت تتحرك بدأت ريحه عجيبة تملأ المكان و زادت بطريقة جعلتني اسأل المضيف "انت شامم الي انا شامه" قال لي "آآآه ده يظهر واحد من الركاب قلع جزمته"  مع العلم يا جماعة ان معظم الركاب اجانب يعني المفروض نضاف ؛ قلتله " الله يكرمك دور عليه احسن الريحة توصل للكابتن و تأثر على تركيزه و يدخل بينا في اول برج يقابله"
المهم الريحه راحت بعد ما الطياره طارت . انا قلت الحمد لله من هنا و بدأ تدفق غير طبيعي من ركاب الطائرة على الحمامين بتوع الطيارة ؛ و بما اني قاعد امام الحمامين الوحيدين الي شغالين في الطيارة فقد فوجئت ان الركاب الاجانب في حالة زنقة مستمرة و مستعصية في بعض الحالات و ده كان بيظهر لما يحصل تفاعل كيميائي شديد يتغلب على الكلونيا الموجودة في الحمام و يخرج ليصيب العبد لله بصدمه تنفسيه حاده.
المهم وصلنا بالسلامة الساعة 3 ظهرا بتوقيت بلجيكا و نزلنا في المطار الي كان فااااااااااضي لدرجة اني خلصت الاجراءات و اخدت شنطتي و طلعت من المطار في عشرون دقيقة.
خارج المطار التاكسيات وقفة طبور منظم جدا كل واحد في دورة ياخد زبونه ؛ انا طبعا فهمت الفولة و اخرت نفسي عشان يجي دوري مع التاكسي المرسيدس ؛ المهم وصلت الفندق بتاعي الساعة 4 عصرا و كان المفروض اني التقي باحد الاشخاص المسؤلين عن هذه الرحلة في فندقه ؛ اتصل بي هذا الشخص و قال لي انه ينزل في الهيلتون و ان الهيلتون يبعد مسافة عشر دقائق من فندقي ؛ و هو ينتظرني عشان نتغدى سويا.
انا طبعا عملت جدع و نزلت الرسبشن اخدت خريطة و سألت اروح الهيلتون ازاي و الراجل مشكورا وصفلي على الخريطة ؛ طلعت الشارع و مشيت على الوصف حوالي 20 دقيقة و لم اصل لأي هيلتون ؛ مش عاوز اطول عليكم ؛ لقيت سور حديد قافل جزء من الشارع الي انا ماشي فيه وواقف عند السور ثلاث اشخاص واحد ببدلة و الاتنين التانيين مش باينلهم معالم من كتر البنادق الي شايلنها . طبعا رحت للراجل ابو بدلة عشان اسأله فوصفلي و قلي لني ماشي صح بس لسه قدامي حوالي عشرين دقيقة كمان ؛ طبعا احب ابلغكم بخبرين مهمين اولا المبنى الي كان متأمن بالشكل ده كان السفارة الامريكيه ؛ اما الخبر التاني اني وصلت فعلا بعد عشرين دقيقة للهلتون ؛ دخلت و سألت على الراجل و لكني لم أجده ؛ حاولت مع الرسبشن كل الوسائل من تركيب حروف الاسم و لكنه مكنش موجود ؛ طبعا حتقلولي رقم الغرفة ؛ المفاجأه انه كان معايا بس الغرفة مكنش فيها حد بالاسم ده ....
**************
حوقف هنا عشان متزهقوش بس لو حبين تعرفوا الباقي قلولي و انا اكمل