كلام القلب و الروح

مهما خبت الوشوش
العيون بلي في القلب 
بتبوح
و انتي عنيكي حبيبتي
خلوني ورا السحاب
اروح
اقطفلك من السما نجمه
واهديكي معاها
القلب
والعين
والروح
وارجع اقولك
وحشتيني
لحظة ما غمضت عيني
و انا معاكي
وحشتيني
لما اتنفست شوية هوا
مفيهمش...
ريحة هواكي
وارجع واقولك
بحب جنانك
لما تبقي جنبي
وتطيري شعرك
على كتافي
وانتي في حضني 
اوعي في يوم
تخافي
بحب لما تتمايلي 
في رقصه دافيه
بين كفوفي
بتبقي بين اديا
و بخبي منك
عنيا
عشان متشوفيش فيهم
خوفي
من حبك
الي مهما حاولت اخبيه
بقا جزء من ملامحي
خوفي 
من نظرة في عينك
مشفش فيها روحي
اصل الوشوش مهما خبت
العين دايما بتبوح
بكل الكلام
الي ما بين 
القلب
و الروح

غربه

قالوا عن وجع الفراق
لا يحتمل
بيعصر القلب
و يقتل في العين
الامل
ردت الغربه و قالت
انا وجعي زي
النار
باكل العمر
و بجرِي الدمع 
انهار
يا قلب يا متغرب
يا مفارق احبابك وانت
 عايش وسطهم
لا تحاول تقرب
ولا تفكر في يوم 
انك ممكن تقدر
ترجعلهم
مكتوب عليك
تبص في عنيهم
وهم مفرقينك
تاخدهم في حضنك
و حيفضلوا 
مش حسينك
تطبطب على قلوبهم
و بكل قسوتهم
في كل لحظة
قاتلينك