ايه وجه الشبه بين الحب و الحب!!!!

اولا احب اسلم على كل من تابع المدونه في الفتره الأخيره و دخلها و ملقاش جديد.
ثانيا حنبدأ موضوع فلسفي...بسؤال نور في مخي الصبح اول ما صحيت من النوم ؛ هل في علاقه بين الحب و الحب ؛ طبعا اي حد حيقرى الكلمتين دول حيقول في عقله ماله الراجل ده ؛ هو غاب غاب و رجع بيقول ايه.
طيب حوضح الفكره بتغيير التشكيل و نرجع نسأل --- ايه الفرق بين الحٌب بضم الحاء و الحَب بفتح الحاء!!!
حد لاحظ الملاحظه دي...الاتنين نفس الحروف بس اختلاف تشكيل
انا قعدت افكر كتير هل في حكمه من هذا التشابه ؛ ولا محض صدفه ؛ بس صدقوني حسيت انه مش صدفه ؛ لا فيه علاقه قويه و قويه جدا كمان ؛ بس عاوزك تقرا الكلام و تفهمه بقلبك و بعدين تعديه على عقلك لو حبيت لأني مش ححط التشكيل على الكلمه و حسيب كل واحد يقراها زي ما هو عاوز.
العصفور بيصحى الصبح اول حاجه يعملها يصوصو شويه عبال ما يفوق و بعدين يطير يدور على رزقه و رزقه هو ايه غير شوية حب ؛ ياكل الحب الي يلاقيه و يرجع يطير و بدافع الحب يرجع لعشه عشان يأكل عصافيره الصغيرين و يديهم شوية حب عشان يقدرو يعيشوا و يكبروا بس قبل مايكون عنده عصافير صغيرين كان نفس العصفور بيطير لما يصحى الصبح يدور على الحب عشان ياكل عشان يعيش و يفضل يطير يدور على الحب عشان يكون عنده عصافير صغيرين يربيهم و يجيبلهم حب.
طيب البني آدم بيعمل ايه تقريبا نفس الشيء ؛ بيتولد و يرضع حب مع اللبن و طول ما هو بين باباه و مامته بيدوله حب بكل طريقه يعرفوها ؛ و على فكره مفيش طفل بيكبر من غيرحب يعني مش بس بالأكل و الشرب ؛ و بعدين لما يفهم شويه و مشاعره تكبر معاه يبدأ يدور حوليه على الحب الخاص بيه و لما بيلاقيه بيطير هو كمان و يبدأ كل شيء في حياته يتغير هو نفسه بيتغير و قلبه بيدق بطريقه مختلفه لمجرد انه شاف حبه و بيعمل كل حاجه عشان يقدر يكون البيت الي يجمعه بالحب ده و تكمل الدورة مرة تانيه.
طيب يبقى الحب و الحب يجتمعوا في شيء اساسي ان الاتنين لازم ندور عليهم و الاتنين مفيش حياه من غيرهم . بس محدش يقولي اننا زي العصافيرلأننا مش زيهم. العصافير ميعرفوش الغدر ؛ العصافير ميعرفوش القسوه ؛ العصافير ميعرفوش الخيانه ؛ العصافير يعرفو الحنيه ؛ يعرفو ازاي يحسسوا بعض بالامان ؛ يعرفو حاجه واحده بس...يعرفو الحب

هويت

للحب كاس شربته و هويت

وبعد ما طرت لفوق

لقيت نفسي هويت

نديت على قلبي

سألته جرالك ايه!!!

قالي يا صحبي انا خلاص هويت

لو كان بإيدي مفتاح الهوى

ما كنت على الارض اترميت

ولاكنت في يوم سيبتك تجيلي

تقلي يا قلبي

انا حبيت

دور

دور يا زمن بينا دور

ابني بينا جبال و بحور

حفضل في قلبي شايلها شهادة

فيها كلمة بحبك بحروف من نور

لأ

نقدر نقول للشمس تشرق
يوم آه و يوم لأ
طب ممكن نخلي واحد عطشان
على كباية ميه يقول لأ
ولا يمكن واحد بردان
تقله اتغطى يبعد عن الغطى
ويقول لأ
يبقى ازاي عاوزاني اشوف عنيكي
واقول لقلبي يبطل دق
ولا اسأله بتحبها
ممكن يرد يقول....
لأ

ذكريات

ذكريات

اطياف و خيالات

تحكي لي روايات

عن زمن ولى و فات

احلام و آمال

تملأ قلوب الأبطال

ولكنها الآن مكتوبة

في صفحة الوفيات

أُقلب الصفحات

أراك في هذه نجمة 

بعيدة المنال

و في الاخرى وردة

تملأ بعطرها القلب و الوجدان

و في المقابلة حلم قلب

تملأه الاشواق

اقلب الصفحات فأراه 

يطير فرحا ينشر الالحان

تملأ الآفاق

ولكن....

 في آخر الصفحة

اراه راقدا على التراب

تملأه الآهات

يقول لي انها في النهاية

مجرد

ذكريات

رحلة الى بلجيكا - حلقة 4 و الاخيرة

السلام عليكم

طبعا زي ما قلتم هيا رحلة مجاعة كأنها رحلة الى الصومال بس هي فعلا كانت رحلة متعبة و انا مش عاوز اتعبكم معايا فيها اكتر من كده فحخدكم على المطار على طول و رحلة العودة لمصر المحروسة عشان تكون دي آخر حلقة.

وصلنا المطار و فاجئني بصراحة المطار و المحلات الي فيه لأني لما وصلت البلد اول يوم المطار كان فاضي و صغير جدا لدرجة اني و انا راجع مصر جالي حالة شك قوية جدا ان ده مطار تاني مختلف عن الي نزلت فيه ؛ محلات جميلة و نضيفة و طبعا احلى محل هو محل الشيكولاته عشان اكون دقيق هو سوبر ماركت للشيكولاته بسسسسسسسس

انا لفيت فيه حوالي ساعة و معايا سلة زي الي موجودة في اي سوبر ماركت و كل ماحط حبت اصناف من الشيكولاته اشي غامق و اشي فاتح و دي شيكولاته بيضه و دي بالبندق ارجع والاقي حاجات شكلها احلى ؛ اروح مرجع دول و حاطط دول ؛ فعلا يعني قمة الحيرة تاخد ايه ولا ايه ؛ و طبعا لم انسى اني اخد شيكولاته خاليه من السكر لزوم الرجيم الي حعمله بعد مخلص الشيكولاتات التانية :)))))

ما علينا ما علينا...

وصلت الطيارة و رحنا نركب مشينا في طابور طويييييييل و اول ما وصلت عند باب الطيارة وقفوني من كتر الزحمة و الناس الي دخلوا الطيارة لسه مقعدوش في اماكنهم ؛ فضلنا وقفين حوالي عشر دقائق لدرجة اني قلت للمضيف الي واقف على الباب " هو ايه النظام الطيارة اتملت و حنركب واقفين لحد مصر ولا ايه؟؟"

تقريبا المضيف قالك ده شكله حيقرفنا نركبه ونسكته و نخلص ؛ راح مدخلني الطيارة و وقف الي بعد مني على طول بره ههههههههه

دخلت لقيت زحمة ومحدش قاعد مكانه حسيت اني في ميكروباص . المهم دورت على الكرسي بتاعي رحت قاعد فيه و مصدر الطرشة للموقف كله بعد كده

الكرسي بتاعي بقى المره دي في نص الطيارة بالظبط و بعيد عن الحمامات و جنب مني كرسي المضيفة و ده شئ ظريف ؛ محدش يفهمني صح ؛ ههههههه انا بس عاوزها تكون جنبي عشان اطمن على الطيارة

قفلوا باب الطيارة و في هذه اللحظة اكتشفت انها نفس الطيارة الي كنا جايين عليها ؛ طبعا حتسألوني عرفت ازاااااااااااي!!!!

من الريييييحة ؛ مش ممكن في طيارتين في مصر للطياران ليهم نفس الريحه؛ انا بقيت قاعد قرفان فقلت الهي نفسي في اي حاجة ؛ لقيتهم فرحانين بالشاشة الصغيرة الي بيعرضوا عليها فيلم و بعض معلومات الرحلة زي الارتفاع و السرعة و الخريطة ؛ طبعا احنا واقفين على الارض لقيت الشاشة كاتبة ان ارتفاعنا 200 قدم فضحكت ؛ جت المضيفة قعدت جنبي رحت سألتها انتوا بتشتغلونا ولا ايه ازاي نكون واقفين على الارض و الشاشة بتقول 200 قدم ؛ الست اتخضت و احتاست و قالتلي لحظة واحدة وقامت جري على اول الطيارة تسأل حد كبير تقريبا يعني ؛ و بعدين رجعت تقولي ايييييه بقى : اصل الشاشة دي واصلة على القمر الصناعي و لما حنطير ان شاء الله حتظبط نفسها. 

شفتوا الاشتغال الي على اصوله ؛ طبعا انا مقدرتش اسكت على الكلام ده لاني اصلا عارف الاجابة بس كنت بشتغلها ؛ رحت قايلها بقى الحقيقة المرة ان الشاشة صح لانها بتقيس الارتفاع عن سطح البحر يعني ارتفاعنا 200 قدم عن سطح البحر روحي بقى فهمي الي قالك الكلام الجامد الاولاني ده ؛ طبعا هي كانت في نص هدومها .

طارت الطيارة و سمعتلكم صوت فظيع من عند الجناح ؛ طبعا رحت سائل المضيفة العظيمة دي عن الصوت و طبعا الاجابة المفيدة " ده صوت عادي اول ما حنطلع فوق الضغط حيظبط الطيارة و الصوت حيروح"

يانهاركم بالالوان هو احنا راكبين طيارة بالرموت كنترول !!! انتممستنيين الضغط يظبط الطيارة ؛ يعني لو زاد عليها حبة حتفك من بعضها ولا ايه!!!

طبعا ده كان رد فعلي الطبيعي على الكلام الفارغ الي سمعته ؛ انا عموما اتشاهدت و قعدت ساكت بعدها ؛ بدأوا في توزيع الاكل ؛ و زي ما قلتلكم في الاول كنت قاعد في نص الطيارة بالظبط و طبعا بيتم تقسيم الطيارة نصفين ؛ النصف الاول يبدأ من اول الطيارة وصولا لعند العبد لله و النصف التاني يبدأ من الكرسي الي ورايا على طول و حتى نهايه الطيارة.

طبعا ده عادي انما الي مش عادي ان المضيفة المسؤولة عن النص الامامي بما فيهم انا تنادي على زميلها المسؤول عن النصف التاني و تسئله "عندك لحمه؟" قالها " لأ ؛ عندك انت سمك؟" قالتله "لأ" و سكتوا.

انا عاوز اوضح بس حاجة ان الطيارة كلها اجانب و محدش فاهم حاجة غيري

وصلوا عندي و كانت الوجبات خلصت و المضيفة تبصلي و مش عارفة تقلي ايه و مشيت و غابت و جت معاها وجبة لحمة و بتقلي معلش مفيش غيرها ....

انا حسيب كل واحد يتخيل المنظر كان شكله ايه

سيبكوا بقى من كل ده ؛ بعد  ما لموا الفضيحة مش الوجبة و الناس قاعدة انا سامع الصوت ايه بيروح و يجي و بعدين لقيتلكم مساعد الطيار ماشي في الطيارة بيدور على حاجة ضايعه منه ؛ راح و رجع اكتر من 8 اة 9 مرات رحت موقفه و سألته " في حاجه ضايعه منك؟"

قالي "لأ ؛ ليه" و قلتله " اصلك رايح جي كتير"

قالي " ده شغل بعملة على الطيارة"

قلتله " واضح ان الطيارة دي كلها اشتغالات ؛ هو في شغل على الطيارة و هي طايرة؟"

قالي " طب لو في حاجه حبقى ابلغ حضرتك اول واحد" و سابني و مشى

انا بعدها قعدت ساااكت و بدعي بقى بكل الادعية الي بفتكرها ان ربنا يغفرلي قبل ما نقع بالطيارة

طبعا الرحلة من اللحظة دي كانت مدمرة للاعصاب بالاضافة اني دخت جدا لان الطيارة مكنتش ثابته و الطيران كان غريب و في النهايه و بفضل الله نزلنا مطار القاهره و اول ما الطيارة بدأت تفرمل راحت الكهربه بتاعت الطياره كلها فاصله ؛ طبعا الاجانب زاموا و سمعتلكم صوت المضيفة الي نسيت اني واقف جنبها بتقول ايه " احمدوا ربنا ان ده محصلش و احنا فوق" و نزلونا من الطيارة على ضوء البطاريات لان النور رفض يرجع تاني لان دايرة الكهرباء بتاعت الطيارة كان فيها عطل لو كان حصل في الجو كانت الطيارة وقعت او ولعت الاول و بعدين وقعت.

يعني مكنتش حعرف اكتبلكم القصة الدي كلها

والى اللقاء في قصة تانية تكون اقصر و دمها اخف

رحلة الى بلجيكا - حلقة 3

السلام عليكم جميعا

في الحلقة الي فاتت وقفت معاكم عند لما كنت قاعد مستني الراجل ينزل من الغرفة بتاعته و كنت قاعد بتفرج على الخريطة ؛ طبعا انتم عارفين لما الواحد بيكون تعبان سعات بيعمل حاجات لا ارادية ؛ المهم واضح ان رجلي كانت بتوجعني لدرجة اني نسيت اني مش في بتنا و قمت رافع رجلي على الكنبة و قعدت اتصفح الخريطة لحد ما الراجل نزل ...

نزل بقى و طبعا انا اول ما شفته حكتله الي حصلي و كنت بحاول امسك نفسي عشان الكلام التاني الي عاوز يعدي من الفلتر بتاع لساني ميعديش ؛ عموما هو انا كنت بكلمه و انا قاعد زي منا ؛ مكنتش متخيل ان طلب اني اقوم من مكاني حيكون بالصعوبة دي ؛ لاني فعلا اول ما حطيت رجلي على الارض حسيت باحساس التلميذ الي ما عملش الواجب بتاعه و المدرس المفتري مدو على رجله 30 او 40 عصايا ؛ نااااااااااار ياخونه من اول صباع رجلي الصغير لحد ركبي ؛ ما علينا ما علينا ... اصل كان فيه في نفس اللحظه كلاب بتعوي جوه بطني من الجوع و لازم اسكتهم و الا حيطلعوا يجروا على الاجانب و تبقى مصر شكلها وحش ... سندت على الراجل و مشينا وحدة وحدة لحد المول الي جنب الهيلتون و نزلنا الفود كورت و كل واحد فينا بيحلم بالاكل ؛ طبعا حا تسألوني احنا جعانين ليه كده حقولكم ان آخر وجبه اكلناها كانت بتاعت الطيارة الساعة 12 ظهرا و وقت ما كنا في المول كانت الساعة حوالي 7:30 و طبعا مش محتاج اشرح شكل و لون و طعم وجبة الاكل بتاعت مصر للطيران ؛ مالوش لزوم عشان ريحت البلوج متبظش. نزلنا انا و الراجل و احلامنا بالاكل تسبقنا و الحيوانات الي في بطننا بتتنطط من الفرحة و يا فرحة ما تمت ؛ وقفنا عند اول مطعم و بدأنا نقرأ المنيو و بدأت رحلة الطلاسم .. كله بالفرنساوي ؛ انا مكنتش اعرف ان الفرنساوي مهم للدرجادي ؛ ايه ده .. مفيش اي حاجة مفهمومه ؛ ده حتى العيش لو فرضنا انهم كانو كاتبين عيش في المنيو مكناش حنعرف هو فين ؛ سيبنا اول مطعم رحنا على التاني و لكن مفرقتش كتير ؛ قلنا احنا نقضيها اسئلة و خلاص ؛ مفيش حد بيتكلم انجليزي خااااالص و بعد 35 دقيقة تقريبا وقفنا عند مطعم مش فاهمين بيعمل ايه بس على الاقل الراجل الي واقف كان بيتكلم انجليزي ؛ سألناه لقينا كل الاكل الي بيعمله من لحمة خنزير. 

بعد ساعة من البحث في الفود كورت ؛ باءت كل المحاولات بالفشل و الساعة عدت 8 و كان لازم نسرع اكتر لأن المحلات بتقفل الساعة 8 يعني ممكن منلقيش ناكل اصلا .

طلعنا بره المول و مشينا حوالي 20 او 30 متر كانت درجة الحرارة -3 و الجو جميل و فجأه دخلت مناخيري ريحة قويه ؛ قلت يا فرج الله في ريحة اكل ؛ و مشيت ورى الريحة و فعلا وصلت لكشك بيعمل شورمة ؛ بصوا هو مش كشك زي الي في بلدنا لأ ده كرفان حلو كدة و شيك ؛ رحنا عليه لقينا الراجل الي واقف فيه سوري  و يا سلااااام ؛ سالناه طبعا عن اللحمة قلنا انها بقري بس ميعرفش مدبوحة ازاي ؛ فقلنا حنسمي و نكبر عليها و ان شاء الله خير ؛ كل واحد فينا طلب سندوتش و الراجل السوري ربنا يكرمه اتوصى بينا ووقفنا ناكل ؛ طبعا حتسألوني بعد كل الجوع ده كل واحد ياكل سندوتش واحد ؛ حقولكم ليه .. لأن السندوتش مش طبيعي ؛ بمعنى ان اي سندوتش مهما كان كبير بتمسكه و تلفه قدام منك لفتين تلاته لحد متحدد نقطة ضعفة و تنقض عليه انقضاضه المعز لدين الله الفاطمي تجعله ذكرى ؛ انما ده سندوتش مكنش ليه  نقطة ضعف واضحه ؛ من كتر ما هو كبير و مليان كان لازم نستخدم شوكة عشان نحفر خندق في محتوياته و نضعف من اساساته عشان بعد كده نقدر نبتدي ناكله كسندوتش طبيعي.

يا سلااااام كانت اكله تمااام نيمت كل الوحوش المفترسة الي في معدة الواحد و قدرت بعدها ارجع الفندق عشان انام و اكمل شغل بقى تاني يوم.

اشوفكم في الحلقة الجاية الي حتكون الاخيرة بقى عشان متزهقوش و عشان هي الرحلة اصلا يومين فمش منطقي انها تاخد اكتر من اربع حلقات بس على فكرة رحلة العودة في الطيارة كانت فعلا رحلة موت.

بالله سلام دلوقتي