رحلة الي المحلة.

احب احكيلكم يا جماعة عن الرحلة دي ؛ مش عاوزكم بس تقولوا ايه الكلام الفارغ ده ؛ او تقولوا احنا مالنا متروح المحلة ولا حتى كوالا لامبور .
صدقوني لو كنت رحت كوالا لامبور كانت حاجة اسهل. عموما اسمعوا للآخر بس .. مش السفر فيه سبع فوايد ؛ دي بقى كانت سفريه فيها مليون فايده مختلفين عن السبعة بتوع اي سفريه تانيه.
اولا يوم السفر يبتدي بعد صلاة الجمعة ؛ اخدت اهل بيتي و طلعت على المحور عشان نوصل للطريق الدائري و منه نمشي في الزراعي. طبعا ده عادي ؛ الي مش عادي بقى اني وانا ماشي على المحور في المنطقة الي فيها الاصلاحات اشوف غراب طاير طالع من تحت صور المحور لفووووق طبعا كتير حيقولوا ايه الغريب في كده!!! الغريب يا جماعة انه مرة واحدة لقيته بيهجم على العربيه انا قلت ده غراب عبيط بينتحر و فجأه طااااااااااااااااااااااااااااااااااااااااااخ راح خابط في الازاز الامامي للعربيه ؛ طبعا مش قادر اوصفلكم الذهول الي انا كنت فيه لانه مطلعش غراب بس طلعت طوبه حجمها محترم و تقريبا واحد ابن حلاااال حدفها ؛ شكله كده كان سباق مين يوصل الطوبه فوق المحور ؛ وواضح انه كان فاطر كويس فالطوبه مش بس وصلت للمحور دي طارت فوق منه و كمان كسرتلي الازاز بتاع العربيه. طبعا نتعلم من كده حاجتين مهمين اولا و انت ماشي على المحور ياريت ما تتخضش لو طوبه جت في عرابيتك دشدشتلك اي حاجه في العربيه ؛ ثانيا اذا حصلك الموقف ده متحولش انك تلمس فرامل العربيه لانك لو عملت كده اي عربيه وراك حتخبطك و مش حترسي بس على ازاز مكسور.
يعني طبعا تفهموا من الكلام ده اني فضلت ماشي زي مانا بالرغم من الازاز الي اتكسر و ده ستر من عند ربنا. و الحمد لله ان الازاز نفسه سيكوريت ففضل ماسك نفسه و موقعش علينا.
المهم وصلت للطريق الدائري و كمان وصلت للطريق الزراعي و مشيت مشيت مشيت مشيت ؛ لحد ما خفت ان المحلة تعدي و اوصل اسكندريه و انا مش حاسس. طبعا الزراعي طريق سريع فمينفعش اسأل اي عربيه ماشيه جنبي ؛ المهم و على احد الكباري حركة المرور اتعطلت و ده كان شئ جميل لاني قدرت اسأل اول نص نقل كان ماشي جنبي و طبعا جاوبني بكل ثقة "الحق انزل يمين من الفتحه الجايه".
و بما اني انسان مطيع سمعت كلامه و نزلت يمين و انا مش عارف يمين ده بيودي فين لانه مش مكتوب اصلا على المنزل ؛ بس بعد ما نزلت لقيت اليافطة بتقول ان المنزل ده يودي على المنصورة.
قلت ماشي ماهو المفروض ان المنصورة و المحلة جنب بعض. نسيت اقول لكم حاجه قبل الكبري الي انا نزلت منه ده كان فيه يافطة بتقول ان طنطا فاضل عليها 50 كيلو ؛ خليكوا فاكرين دي عشان حتنفعكم بعد كده.
المهم فضلت ماشي في طريق المنصورة حوالي ساعة و مرة واحدة الطريق خلص و بقى فيه طريقين يمين و شمال و فيه يافطة مرور مش مكتوب عليها حاجة بس مرسوم عليها سهم متجه يمين ؛ مش عارف ليه رحت انا رايح شمال و الحمد لله مطلعش غلط و مشيت في الطريق و فعلا لقيت يافطه تانيه بتقول المنصورة قلت ميمنعش اسأل عشان اطمئن ؛ فوقفت جنب واحد ماشي في الشارع على رجله و قلتله " هي المحله طريقها ازاي؟" فقالي و هو مستغرب " ادخل من الفتحة الجايه شمال على ميت غمر" طبعا انا قلت اكيد هو مفهمش السؤال و سيبته و مشيت. انا مالي و مال ميت غمر.
قبل المنصورة تقريبا ب 500 متر قابلني كبري كبير عديت من تحته و على مدخل المنصورة قلت اسأل بقى عسكري المرور عشان كده بقى خلاص وصلت تقريبا للمحلة فملوش لازمة اتوه.
سألته فقالي " يااااااااه انت لازم تلف تاني و ترجع تطلع الكبري و تمشي على طول لحد كبري علوي تاني تطلعه اوعى تمشي جنبه و لما تنزل منه حتلاقي مدخل المحله"
قلت كويس مش بقلوكم خلاص وصلنا.
لفيت و رجعت طلعت الكبري و فضلت ماااااااااااااشي مااااااااااااااشي لدرجة اني قلت مفيش كبري علوي تاني ولا ايه المهم بعد 30 دقيقة وصلت للكبري التاني ؛ طلعت عليه لانه اصلا مينفعش مطلعش عليه لانه مفيش طريق جنبه ؛ المهم نزلت منه لقيت الطريق مكمل و مفيش مدخل للمحلة و بعدين لقيت نفسي قدام مفترق طرق ؛ حوالي 5 طرق مختلفة على ميدان صغير فوقيه كبري . وقفت و نزلت اسأل ؛ فواحد ابن حلال قلي روح شمال مع الكبري و خليك ماشي طوالي حتوصل المحلة . مشيت زي ما قلي بعد 20 دقيقة في الطريق ده لقيت يافطة بتقول "طنطا 58 كيلو" فاكرين لما كانت طنطا 50 كيلو ؛ حد فيكم يقدر يوصف احساسي في اللحظة دي؟؟؟
المهم فضلت ماشي وصلت لمنطقة اسمها محلة ابو علي قلت كويس اهه كله محلة صحيح الطريق كان مكسر بس احسن من مفيش و شويه و لقيت نقطة شرطة المحلة الكبرى ؛ طبعا كنت في منتهى السعادة و بعدين مرة واحدة لقيت الطريق بيلف يمين و شكله بيتحسن و بينضف و على شمالي كاسرين حته في الجزيرة يعني عشان لو كنت عاوز تفضل ماشي في الشارع المكسر ممكن تحاول تعدي من الفتحة دي. فطبعا الاختار الطبيعي اني مشيت في الطريق النظيف ؛ و كان شكله من بعيد بيلف فقلت حيلف و يدخلني البلد تاني ؛ بعد 10 دقايق من الطريق ده لقيت البلد بتبعد و مفيش اي حاااجه باينه في الافق ممكن تدخلني على البلد. قررت اني الف و ارجع ادخل من الفتحة المكسورة و امشي في الطريق المكسر و مش حسأل حد خااااااااااالص ؛ و فعلا لفيت و بعد 50 متر تقريبا لقيت يافطة مرور مكسورة وواقعة على الارض حاولت اقرأ المكتوب و نجحت الحمد لله لانها كانت بتقول "<-- المحلة الكبرى" فطبعا اول شارع يمين قابلني دخلته و طلع صح هو بتاع المحلة. ياااااااااااااااااااااااااااااااااااااااااااااااااااااااااااااه وصلت الرحلة دي اخدت مني 3 ساعات و 45 دقيقة و المفروض انها على اكثر تقدير تاخد ساعة و نصف. نتعلم منها كمان اننا منسألش حد على الطريق لو عاوزين نوصل بسرعة و طبعا طبعا ننسى اننا نعتمد على اي يافطة مرور عشان توصلنا لأي حته. نسيت اقلكم حاجة ؛ فاكرين الراجل الي قالي اروح شمال لميت غمر ؛ طلع عنده حق و فعلا كان ده طريق اسهل و اقصر.

انواع الحب

نيجي بقى للموضوع الي ما قلتلكوش عليه ؛ الي هو ايه!!!!!!!!!! انواع الحب. بصوا بقى اولا مش عاوز حد يفكر يقاطعني ؛ كملوا قرايه للآخر وانتوا حتفهموا وجهة نظري ؛ اتفقنا؟

في ناس بتقول ان الحب نوعين حب عذري و حب مش عذري ؛ انا مش حتكلم عن الحب من وجهة النظر دي ؛ لكن خلونا نتكلم عن الحب من وجهة نظر كلنا نسيناها.

يعني تعالوا نقسم الحب لكام نوع ؛ يعني مثلا في حب الأب لإبنه و في حب الأب لبنته. السؤال المطروح هنا ؛ هو في اختلاف؟ الاتنين اولاده يبقى حيحبهم زي بعض ؛ الاجابة لااااااااااااااااااااااااااااااا
الولد بالنسبة للأب هو عزوته ؛ سنده ؛ يحبه و يخاف عليه و كل الكلام الجميل الي ممكن نقوله بس لازم يقسى عليه عشان يتنشف عوده ؛ البنت دي بتكون حاجة تانيه حبها مختلف لانها بالنسبة للأب الحنية والحب الي ملوش حدود يعني مفيش اي نوع من القسوة ممكن تكون موجودة.
طب تعالو نبص للموضوع من النحيه العكسيه ؛ يعني من نحية الاولاد للاب. هو بالنسبالهم الحماية و السند و في اوقات كتير مصدر اللعب و التنطيط ؛ لحد ما يكبروا يفتكروا نفسهم بيفهموا يبتدوا يتعوجوا عليه ؛ تقوم الدنيا تديهم على دماغهم ؛ يعرفوا ان الله حق . في منهم بيرجعوا لعقلهم و في منهم بيركبهم العند و دول ربنا يسترها معاهم بقى.

خلاصة النوعين دول من الحب من وجهة نظري؛ حب ربنا بيزرعوا في قلب الاب في نفس اللحظة الي بيشيل فيها مولوده الصغير عشان يقول في ودنه الادان و ده نوع مش ممكن يقل او يتغير مهما حصل لانه مش قائم على اي نوع من انواع المنفعة . اما الحب العكسي الي هو من نحية الأبناء لابوهم فهو حب قائم في مبدأه على المنفعة ؛ يعني هوحب شديد طالما الأب يعطي بشدة و الابن محتاج بشدة ؛ اما اذا قل عطاء الاب لأي ظرف او اشتد عود الابن او البنت فهذا الحب يتغير و يختلف ؛ ليس بالضرورة يقل و لكنه لن يكون ابدا بنفس الشدة.

طيب فين الأم ؟ الام بقى يا جماعة دي حاجة مينفعش اوصف حبها لأولادها لسببين الأول لأن ده الحب الي الرسول عليه الصلاة والسلام اوصى بيه و بصاحبته ثلاث مرات ؛ و السبب الثاني اني مش أم فأكيد مش حعرف اوصفه. انما الاولاد هما هما نفس النداله ؛ و ارجوكم محدش يعترض و يقول "لا احنا مش اندال" ؛ او حتى يقول" يا عم اتكلم عن نفسك". بصوا كلنا اندال مع امهاتنا حتى انا و لو مكناش اندال مكنش الرسول عليه الصلاة و السلام احتاج يوصينا ؛ و كان زمان الراجل الي راح للرسول عليه الصلاة و السلام و قال له انه خدم امه و نام تحت رجلها و شالها على كتافه و لف بيها الكعبة ؛ كان زمانه ارتاح ؛ لأن الرسول عليه الصلاة و السلام قال له لم توفيها حق طلقه واحدة و هي تلدك. حد بقى يستجري يقول لي انه مش ندل. بس بلاش نقسوا على انفسنا احنا بنحب امهاتنا و الي ربنا بيقدروا على حاجة بيعملها.

المهم الام دي مصدر الحنان و الحب و الامان و الاطمئنان و .........هي مصدر تعليم الحب و دة الجديد ؛ ايوه احنا بنتعلم نحب من امهاتنا ؛ يعني دائما حتلاقي اكتر شخص اي طفل صغير بيحبه هو الشخص الي امه بتحبه قوي لان مشاعر الام بالفرحة و الحزن و كل المشاعر بتتنقل للطفل.

في كمان نوع من الحب ظريف و دمه خفيف ؛ الي هو حب الاخوات لبعضهم ؛ ده اعتقد انه نوع كوميدي ؛ يعني يضربوا بعض بس بيحبوا بعض ؛ يتخانقوا مع بعض بس يخافوا على بعض ؛ يخدوا الحاجة من ايد بعض بس لو حد فيهم احتاج حاجة يجروا عليه كلهم.

طبعا لكل قاعدة شواز بس مش عاوزين نتكلم عنهم دول.

تعالوا بقى نتكلم عن النوع الي كلكم مستنيين اوصله ؛ انا مش حديله اسم ؛ انا ححاول اوصفه وكل واحد فيكم يقلنا الاسم الي يخطر على باله.

تخيل نفسك او تخيلي نفسك ؛ عايش و مقرر انك ملكش دعوة بالجنس الآخر ؛ انت بتفكر في مستقبلك ؛و حياتك ظريفة ؛ بتخرج مع اصحابك و بتشتغل و كل الناس صحابك واخواتك ؛ ولاد و بنات مش فارقة . و بعدين في يوم من الايام تصحى من النوم كده و حاسس ان قلبك تايه ؛ يعني هو بيدق في صدرك بس بيدق دقه زيادة ؛ و ساعات دقه ناقصة ؛ هو محتار يدق ولا ميدقش ؛ طب ليه كل ده ؛ اصلك كنت بتحلم حلم جميييييييييل ؛ كنت بتحلم بواحدة من اصدقائك من اصحابك من معارفك من زمايلك؛ كنتم ماشيين مع بعض و كنت بتتكلم معاها و هي بتسمعك ؛ كنت بتحكيلها على قلبك و على احساسه بالفراغ و هي بتبصلك بعينيها الي ماليانين كلام و بتسألها على طريقة تصالح بيها القلب التعبان ده ؛ فتقرب منك و تمسك ايدك و تطبطب عليها و تحطلك راسك على حجرها و ايدها على خدك ؛ و تصحى انت من النوم حاسس بيها معاك حاسس بيها في كل حاجه في الاوضه حتى لمسه ايدها موجوده على خدك ؛ ريحه العطر بتاعها بتجري في مخك.

ايه ده هو انا اتجننت ولا ايه؟ ايه التهريج ده!! ده كلام فارغ. و تعترض كل الاعتراضات الي ممكن تعترضها و تقنع نفسك انه حلم ؛ و تقوم تحضر فطارك و تفطر و كله تمام و تنزل تقضي يومك عادي و تنسى الحلم و الي حصل فيه.

و بعدين في يوم كده عادي تشوف البنت دي ؛ و فجأه كده تفتكر الحلم ؛ تسلم عليها و انت قلبك بيرقص و عينيك بتضحك بتسلم عليها زي متكون اول مرة تشوفها ؛ فرحان بيها زي متكون كانت وحشااااااااااااااااااااك قوي ؛ كانت مسافرة و رجعت. و طبعا هي مش فاهمه مالك و مش بعيد تكون قلقانه منك. و لما ترجع بيتك تلاقي نفسك فرحان و انت مش عارف ليه ؛ يعني محصلش في اليوم اي حاجه مختلفة ؛ يوم زي كل يوم ؛ بس انت فرحان ؛ ماشي في البيت بتدلق فرح. و تحصلك الصدمة بقى اول ما تقعد مع نفسك ؛ هو في ايه؟ و بعدين تيجي صورتها بتضحك في عينيك تقوم تضحك انت كمان " لاحظ انك قاعد لوحدك" تتنفض و تستعيذ بالله و تقوم تصلي ؛ تخلص صلاه و انت لسه قاعد على السجاده تفتكر موقف تاني ليها و تالت و رابع و ............... ايه ده انا بقالي ساعه قاعد على سجادة الصلاة سرحان في ايه في مين؟؟ ليه؟ هو ايه الي حصل؟ ايه الريحه دي؟ لتاني مرة ريحه العطر دي في عقلي؛ لا مش في عقلي دي في اوضتي ؛ بس ايه الي حايجبها في اوضتي؟ ايه الصوت ده ؟؟ هي موجوده عندنا في البيت ؟؟ ازاي يعني ايه الي حايجبها؟ و تقضي ليله زي الهبا....ب.

تنزل تاني يوم مضروب بالنار تمشي في الشارع عشان تروح في اي حته ؛ فجأه ترفع عينيك تلاقيها في وشك و بتضحك الضحكه الي بتخلي قلبك يكسر اول عضمتين قدامه في قفصك الصدري عشان ينط يحضنها. تسلم وانت متلخبط و تستأذن و تمشي بسرعة ؛ و تسأل نفسك هو انا مشيت هنا ليه ده حتى مش طريقي؟؟؟ المهم انت مش حتلاقي اجابه.

نيجي بقى للقشة الي قسمت ظهر البعير ؛ بعد كام يوم من اللخبطة و الصراع الداخلي و طبعا مش حقلكم كم الغباء الي بييجي في اللحظات دي لانك كل سؤال بتسأله لنفسك مش بتعرف تجاوبه ؛ المهم تقرر تخرج مع اصحابك عشان تفرفش ؛ وتقعد معاهم على البحر و بعدين و انت قاعد كده تحس ان قلبك بيدق زياده و ان الدم عامل سباق في عروقك و لو عندك شعر في راسك حتتمنى انه يقع لانك حتحس بيه واقف زي متكون في فيلم رعب ؛ اييييييييييييييييييييه ده ؟؟؟؟

تبص وراك ؛ شمالك ؛ يمينك؛ تركز عينيك على العربيات الي معديه بتجري ؛ بتدور عليها . ايوة انت بتدور عليها ؛ انت عاوز تشوفها ؛ انت حتموت لو مشفتهاش دلوقتي ؛ ايه ده؟؟ عربيتها جايه هناك وسط العربيات؟ معقوله !!!! ايوه صح هي . و تعدي العربية و تشوفها فيها و شعرها طاير من الهوا الي داخل من الازاز . متقليش انك لسه مش فاهم . ده انت قلبك كسر بقيت عضم صدرك و نزل يجري وراها .

و اخيرا تعترف لنفسك و اخيرا الذكاء يرجعلك تاني و تلاقي اجابات اسئلتك كلها اخيرا تقف كده مع نفسك و بكل قوة و حنان و غضب و فرحة وتقول انا بحب البنت دي و الا ايه؟ يانهاااااااااار بالالوان هو انت لسه بتسأل ؟ هو الغباء لسه مسيطر!!!! لا ابدا انا بحبهاااااااااااااااااااااااااااااااااا.

وطبعا حياة سعدتك حتتغير من اللحظة دي ؛ مش حقول 180 درجه لانها حتتغير في اتجاهات كتير. حتتغير لدرجة انك تقريبا كل يوم حتلاقي نفسك بتقف في نفس الحته الي لمحتها منها و هي معديه بعربيتها المرة الي فاتت عشان تلمحها تاني ؛ لانك حتلاقي نفسك مش نافع معاك انك متشفهاش يوم ؛ حتى لو من بعيد . حتلاقي نفسك عارف انك حتشوفها لو كنت قاعد في اي مكان و هي حتعدي على المكان ده حتى لو مش بينكم معاد و لا اتفاق. حتلاقي نفسك بتسألها ايه الي مضايقك؟؟ حتى لو كانت بتضحك معاك و بتحاول تخبي ضيقها عن الناس كلها ؛ انت عرفت ازاي انها متضايقة؟ حسيت ازاي انها جايه ؟؟ مين الي قال لك انها مبسوطة؟ خمنت ازاي الحجات الي بتحبها؟!

لو جدع بقى جاوب على الاسئلة دي باجابة تانيه غير ان قلبك الي قاعد معاها هو الي بييجي يفتنلك على كل الحجات دي.

ده نسميه ايه بقى؟!!!!!!!!!!

بس لو سمحتم محدش يقلي حب ؛ لان ده مش حب.

حياتي

حياتي ؛ جميلة هي رغم قبحها ؛ قصيرة رغم طولها ؛ عنيدة رغم سلاستها ؛ حياتي.مرت امامي كومضة برق تذكرت خلالها احزاني و افراحي ؛ تعبي و راحتي ؛ حبي و كرهي.

رأيت ادق التفاصيل بل عشت احداثها مرة أخرى و الموج يحتضني و زبد البحر يحيط بي و انفاس خارج صدري لا تستطيع الدخول و اخرى مسجونة داخله لا تقوى على الخروج. وحين استسلمت و تلامس جفناي ظهر امامي وجهها و اخذت صورته تتضح حتى ملأت الكون من حولي. و كأن الزمان يعيد نفسه ؛ فها أنا اقف في مكان اول لقاء لنا ؛ رأيتها قادمة نحوي فسحرني جمالها و أطاحت بعقلي رقتها ؛ فانحنيت الى وردة حمراء لم تجف دموعها ؛ قطفتها و بكل جرأة لها أعطيتها. و مع الوردة قدمت لها قلبي ؛ و في الوردة وضعت كل حبي.

فابتسمت لي عيناها و امتدت يدها بتردد و أخذتها ؛ فأخذت مع الوردة قلبي و روحي و كل حواسي. فرفرف قلبي فرحا و طار في سماء دنيا العشق ليبلغ الخبر لكل العشّاق ؛ و غاص في بحور الحب ليأخذ مكانه في الأعماق.

تعاهدنا على ان نلتقي؛ و التقينا و تشابكت ايدينا و تعانق قلبينا هنا في هذه البقعة المباركة على شاطئ البحر؛ الذي شهد علينا و جلسنا على رماله التي احتضنت داخلها نبت حبنا و شاركتنا أحلامنا. في هذا المكان رأينا السماء تميل على البحر باستحياء لتطبع على وجنته قبلة حانية بفم باسم مزدان بلون احمر شفاف ؛ ومر الوقت علينا كنسمة هواء مرّت بين اوراق زهرة لتحمل رائحتها و تملأ بها الاجواء. رأينا القمر يخرج من بين الامواج لينير بضوءه طريق العشاق.

و لكن ها انا أعود لأقف وحيدا في نفس المكان بعد ان اختارها القدر كي تكون رفيقته ؛ اعود كي أسمع ضحكات حبات الرمل و همسها قائلة "أليس هذا هو العاشق الذي خدعه الموت و أخذ حبيبته؟!" ؛ فتشتعل بداخلي نيران الغيظ فادهسها بقدمي و انا اسير مترنحا كمن جرع لتوه زجاجة خمر ففقد الاحساس بالزمان ؛ و لكني لم افقد احساسي بالمكان. المكان الذي تحول من جنة تجمعنا الى قاعة محكمة أقف انا في وسطها و الانظار كلها تتجه لي فالرمال تنظر ساخرة و البحر متخبطا مشفقا و السماء ترمقني بعين حمراء غاربة. و سمعت صوتا ينادي من بعيد بأن بدأت المحاكمة ؛ فأطبقت علي السحب ووضعتني في قفص الاتهام. و أغمضت الدنيا عينها ليظهر القاضي بوجهه الأبيض المضيئ في رداء أسود لامع ووجه الي الاتهام ؛ فتصايح الجميع اني مذنب. فنظر الي القاضي و سألني ان ادافع عن نفسي ؛ و عندما بدأت الكلام رأيت وجها ضاحكا ساخرا رأيت وجه القدر ؛ فاحتبست الكلمات داخلي و رأيت وجه حبيبتي و الدمع كالأنهار يجري على وجنتيها ؛ فمددت يدي كي أمسح عن هذا الوجه الذي عشقته باسما هذه الدموع و لكن ابدا لم تصل يدي. وخرجت الكلمات مني مليئة بالحزن و تسألت "هل انا مذنب؟ فيما أذنبت؟ هل أذنبت عندما احببت؟"

فأجاب القاضي:"لقد تسببت في قتل قلب برئ"

فقلت :"أي قلب هذا الذي قتلت؟"

فصاح القاضي غاضبا :"قلبك انت"

تعجبت :" أقتل قلبي؟ ان هذا مستحيل ؛ لقد وهبته الحياه بحبها و لكن من قتله هو القدر"

و أشرت الى ذلك الوجه الساخر . فسرت همهمه غاضبة و تصايح الجميع "ليس القدر من قتله ؛ بل انت"

و أصدر القاضي الحكم بالموت جزاء لي على مما اقترفت في حق قلبي ؛ و سمعته يقول بصوت اختلطت نبراته بضحكات القدر الساخرة :"عش بدونها ؛ عش مع ذكراها".

و اسدل الستار عن هذه المحاكمة و اختفى القاضي و عدت وحيدا في صحراء يحيطها الماء. و بحثت عن طريقي كي اعود و لكني لم اجده؛ ترى الم يكن هناك طريق للعودة ام لم تكن بي أنا رغبة أن اعود. فنظرت الى البحر فوجدته يمد لي يد المساعدة ؛ فسرت اليه و مددت اليه يدي و تلامس جسدينا فاحتضنني بأمواجه.

و هكذا رأيت حياتي تمر أمامي ؛ لقد اعتقدت للحظة انه باستطاعتي ان أتغلب على القدر و لكنه الأقوى دائما. فامتدت يده تنتزعني من أحضان صديقي و تقذفني الى الشاطئ الذي استقبلتني رماله بقسوة و قالت " قدرك أن تعيش وحيدا".

لكن لا لن أستسلم سأبحث عن طريق آخر ؛ عن صديق آخر يقودني و يساعدني في الوصول الى هدفي يساعدني كي أسقط حكم القمر.

ايه الفرق بين الانسان و الحيوان!!!!!!!!

ممكن السؤال ده يكون قديم وتكونوا عارفين اجابته زي ما انا كنت فاكر اني عارف الاجابة.. بس صدقوني الواحد كل مايعيش كل ما يفاجأ ان الاجابات الي يعرفها ممكن تكون مش صح.
حد يسألني ازاااي؟؟؟ ها مش سامع حد بيسأل..مش عجبكم الكلام !!! طب انا حكمل من غير محد يسأل.

يعني مثلا الاجابة المعروفة ان الفرق هو العقل ؛ زي ميكون الجيوان معندوش عقل ؛ بس لو فكرنا شوية حنلاقي ان الحيوان عنده عقل و في حيوانات اثبتت انها اعقل من الانسان و اذكى ؛ يبقى ازاي ده يفرق بينا و بين الحيوانات ؛ ده كده الفرق في صالح الحيوانات.
اوووم انا بقى فكرت و تفتق ذهني عن فكرة او اجابة احسن من موضوع العقل ده ؛ قلت انا بقى ان الفرق بين الانسان و الحيوان هو المشاعر.
طبعا مع الايام اكتشفت ان الحيوان عنده مشاعر و بيحس اكتر من ناس كتيييييييييييييييييييييييييييييييييييييييييييييييييييييييير؛ يعني لو كنت مصاحب كلب و الكلب ده زعلك - و ده نادرا ما يحدث - حتلاقي الكلب زعلان لزعلك و حتلاقيه بيلحس ايدك عشان تسمحه ؛ تعالوا بقى نشوف الانسان لو انت زعلان من حبيبتك و هي غلطت فيك او العكس مثلا؛ فيه كام وحده بتعتذر و متسبش حبيبها يسبها وهو زعلان صعب مش كده ؛ دي تسيبه يضرب راسه في اتخن حيطه تقابله و عندها الف مبرر لغلطها و لو مفيش مبرر يبقى تعمل مش فاهمه هو زعلان من ايه بس المهم محدش يقول انها غلطانه.
قلت بس برده الانسان عنجه مشاعر الامومة غير الحيوان. الايام اثبتت ان حتى دي عند الحيوان احسن ؛ يعني مفيش نمرة بتاكل عيالها و لا بترميهم ولا بتبيع ولادها ؛ بس الانسان بيعمل كده. مفيش حيوان بيهد عش ولاده بس الانسان ممكن بانانيته يهد بيت عياله و المصيبه انه بيكون فاكر ان ده حب و خوف عليهم.
يعني حتى في المشاعر الحيوانات احسن.
آخر فكرة فكرت فيها الكلام حيث ان الانسان بيتكلم و الحيوان لأ. و حتى دي طلعت غلط. لأن الحيوانات بتتكلم و ربنا قال انه علم سيدنا سليمان لغة الحيوانات. يبقى احنا الي جهلة و مش بنفهم الحيوانات بتقول ايه. المفجأة انهم بالعشرة مع الانسان بيفهموا كلمه (قصدي الحيوانات) يعني لما تربي قطة وتقلها تعالي بتفهم و تيجي ؛ لو قلتلها امشي بتمشي بس العكس مش ممكن يحصل ؛ يعني لو القطة دي عاوزاك تقرب منها مش ممكن حتفهمها لو مش طيقاك و عاوزاك تبعد عنها ووقفت على ديلها عشان تفهمك مش حتفهمها. يبقى العيب عند مييييييييييييييين.

بصوا انا شايف انحنا نتلم و نسكت و نبطل فلسفة عشان الخلاصة كدة الحيوانات طلعو احسن مننا في كل الفروقات الي بينا و بينهم.

أحبها

أحبها..
كيف أقول لها أني أحبها؟
أاقول أحبك؟
كلمة لا ينطقها لساني
و تقولها عيني
في كل نظرة أنظر بها إليها
تطير بها روحي
و لها تعود
ينبض بها قلبي
ليملأ بحبها الوجود
أحبها..
في كل همسة
اهمس بها لنفسي
اقولها..
في كل نفس
يدخل الى صدري
أحبها..
في كل لمسة
لوجهها في خيالي
أعشقها..
فكيف أقول لها أ،ي أحبها؟
لا لن أقولها
سأدع صمتي يكلمها
سأدع عيني تخبرها
سأطلق سراح روحي
لتذهب اليها و تقول لها..
حبيبتي..
انت راحتي و حيرتي
انت جنتي و ناري
انت من لها أحيا
و بدونها أموت
فأنت دمي الذي يجري في العروق
حبيبتي..
أحبك.