لحظات عشق

سمعت كثيرا

عن بحور العشق و الهوى

عن عشاق قلوبهم تحيا

بنار الحب و الجوى

حلمت يوما ان اجد شواطئها

ان تبتل قدمي بامواجها 

و يغوص قلبي في اعماقها

لبثت احلم حتى رسمت

صورة لشواطئ الهوى

في خيالي

تجسدت احلامي

حين رأيتك تجلسين

و بعينان يملأهما التساؤل

لمن حولك تنظرين

حائرة انت

تمسكين بقطعة حلوى

تنظرين اليها 

و تعطينها وعدا

ان تذيقيها من عسل فمك

وحين لامست شفتيك

انطلق عنان الحاسدين 

رائعة انت

ينسدل شعرك بلون 

شروق شمس الخيال

مؤكدا ان الوصول اليك

شيئ محال

رقيقة انت

جلست امامك دون اختيار

دقات قلبي تخبرني

انه قد آن الاوان 

و انه ليس وقت انبهار

ناعمة انت

تقابلت عيوننا

و بدأ الحديث بيننا

تعارفنا و تقاربنا

في لحظات تلاقت ارواحنا

و جاء صوت منادي

كي ينهي خلوة قلوبنا

انه وقت رحيلك

عندما تحركت لتغادري

تلمست الهواء حولك

كي يكون أخر ما اتنفسه منك

هو رحيقك

ثبت عيناي عليك

كي لا تفوتني اي من تفاصيلك

رحلت و تركتيني لأحلامي 

انظر لمكان جلوسك

و اضيف الى لوحة 

شاطيء الهوى 

صورة لك 

لأستمر في صحراء حياتي

و انا احمل في قلبي

صورة لشاطيء مررت به للحظات

هويتك فيه و تلاقت ارواحنا 

و ملأ قلبينا الشاطيء دقات

لحظات عشق مرت بنا 

و مضت

و لكني ما حييت لن انساك

حبيبتي انت

حلاوة روح

اوقات الشعور بالألم و اليأس بيكونوا عاملين زي خيالك في كل حته وراك ملازمينك ؛ تحاول تجري بيجروا معاك ؛ بتقف تلاقيهم حواليك ؛ تعمل نفسك مش شايفهم و تبص للدنيا و تقول انا عاوز اعيش و حعتبر خيالي ملوش وجود تلاقي جواك مهدود.
يجي الليل  و تفتكر ان خلاص حترتاح تبص على الارض متشفش خيالك ؛ تضحك على نفسك و تبص للسما و تحاول تشوف فيها جمال النجوم تلاقي القمر بيقولك انت عارف ان آلامك و احزانك مستخبيه جواك بتنخر في قلبك و روحك زي ما بياكل السوس في الخشب. لازم تحرق قلبك لو عاوز تنسا المك اصل السوس مبيمتش غير بالنار.
متلاقيش في بالك غير شوية اسئله ؛ تبص للقمر و تحاول تسأله يسيبك و يمشي؛ تمد ايدك جوا صدرك تحاول تطبطب على قلبك تهديه تلاقي في كل دقاته  زعلان منك  يبصلك و يقولك داويني انا لاص تعبت ؛ تجري عينك على الدوا  عايزه تخطفه عشان تداوي بيه قلبك تلاقي روحك بتقولك

ازاي اداوي جرح قلبي
و دوايا ممكن يجرحك
ولما حاولت انسا وجعي
خفت نسياني يوجعك

القلب المجروح لازم يعيش مجروح حتى لو حاولو يداووه اصل الدوا ده كله حلاوة روح

كان يا ما كان

كان ياما كان
قلب صغير عايش يومه
بينام و يصحى من نومه
بيحلم انه في يوم حيحب
مكنش يعرف ان جرحه
مفيش كلام حيعرف يوصفه
و كان ياما كان
كل يوم بيقابل وشوش كتير
ويشوف من القلوب الوان
ولما شاف قلبك
حس جواه بالحنان
اترمى في حضنه
و قالك بحبك
و افتكر انه كده
لقا الامان
ده كان زمان
انهارده و احنا بنحب بعض
مبقاش للفرح بينا مكان
و الحزن ملانا زي الطوفان
لما نتسأل عن الحب
بنقول منعرفوش
حتى الضحكه ضاعت
 من الوشوش
لما القلوب قست على بعض
و نرجع نقول
كان ياما كان
الحب و العشق قصه
نقراها في كل مكان
لناس كانوا بيحبو بعض
زمان

كلام في الحب

قالوا في الحب

كلام كتير ميوصفوش

سعاده و هنا

شجن و دموع

وانه لحظة ما بيتولد

بيبان في الوشوش

بس الحقيقه مش كده

اسأل اي قلب موجوع

حيقولك

الحب سهم طاير

بيكسَر في القلوب

من نظرة وابتسامه

بتتلاقى الدروب

و في لحظة الفراق

بتموت براءة العيون

الحب بيخليك تحلم

بناس ميستهلوش

تطبطب عليهم وهما

يكسروك وميتكسفوش

عشان كده 

كتبت على قلبي

لو سمحتو

متقربوش

متستغربش

متستغربش

لما تبقا عاوز تقول كلام

وتلاقي الكلام..

مبيتقلش

اوتكون وسط ناسك

حاسس بالغربه

و انك...

متشبهمش

تمشي في الدنيا وحدك

تسال فينك يا صاحبي

يالي جرحك كان دايما

هو جرحي

ولما تقابل صاحبك

تجري عليه ..

تقرب منه..

تاخده في حضنك

يعمل نفسه...

ميعرفكش

فمتستغربش

تغمض عنيك

تحلم بحضن يضمك

ولما تحبها

وتروح لقلبها

تقوله بحبك

يرد عليك يقولك

مبحبكش

فمتستغربش

تسمع صوت صرخة

طالعه من بين ضلوعك

تحط ايدك

على صدرك

تحاول تكتم صوت قلبك

بس صوت الوجع..

مبيتسمعش

صوته يكسرك

يهد روحك

ومهما قلبك صرخ

بيفضل صوت صرخته

جواك

هي دي دنيتنا يا قلبي

اعرف قسوتها

ومتستغربش

اوهام

على وشي ضحكه
مليانه دموع
جوايه قلب بيصرخ
من الظلم موجوع
في الدنيا عايشين
و الالم معشش بين الضلوع
الحلم راح و خلاص
مفيش امل للرجوع
طريق مشيناه
وحلمنا كان شوية حنيه
قلب يحس و في حضنه
نلقا الامان 
مقبلناش غير قلب 
مليان أسيَه
وحكايتنا اتكتبت 
كلها فراق و حرمان
ايامنا عدت علينا
مليانه بالاوهام
يوم نعيشه حب
و يوم نعيشه قلق
و باقي الايام 
مفيهاش غير احزان
يا دنيا ليه بتعادينا
و احنا عايشينك 
و احنا عاشقينك
و ما طلبنا منك
غير حب وكرامه
ليه تحرمينا
من اننا نعيش
و احنا بعد شويه
سايبينك 
وحتنسينا 
كأننا معشناكيش

انت مين؟؟

الدنيا فيها الي بيعيش عبد
وفيها الي بيعيش حٌر
و فيها ناس بتموت من البرد
و ناس تانيه مش مستحمله الحَر
انت مين فيهم!
ده سؤال مش مهم
لأنك ممكن تلاقي حٌر منغير قلب
و عبد من العبيد يغرقك حب
و ممكن حضن في عز الحَر
يملا قلبك برد
و لمسة ايد في قلب التلج
تدفي مشاعرك
و تملا حياتك ورد
و يبقا السؤال المهم
انت عندك قلب
بتحس بيه
بتحب بيه
ولا وجوده زي عدمه
فرحه زي المه
في البطاقه انسان
لكنك في الحياه
مينفعش حتى تظهر
في عالم الحيوان