كلمتيني في التليفون
اشتكيتي مني
عشان عدى يوم و متصلتش
قلت آخد بخاطرك
قلتيلي انت من شهر منزلتش
الدنيا و المشاغل
و كلام كتير سمعتيه
بس اكيد احساسك متغيرش
انا واحشك
و انت كمان وحشاني
في البدايه مكنتش بتنساني
قلتيها و نبرة صوتك وجعاني
يا امي عمري ما نسيتك
ده انا كل حاجه فيا منك
طيب حتيجي الاجازة دي
عشان خاطرك حنزل
وحشني اكلك
طيب خلي بالك على نفسك
ياااه يا امي
افتكرت كل ده و انا جنب قبرك
عاوز اشوفك و ابوس ايدك
ندمت على كل اجازة
كسلت اجيلك
دلوقت بقيت واقف جنبك
و مش شايفك
مبقتش سامع منك غير
و انت بتقوليلي
خلي بالك من نفسك
الله يرحمك يا امي
ليست هناك تعليقات:
إرسال تعليق