بنعيش حياتنا متغربين
نسافر و نبعد
على وعد اننا راجعين
وتمر ايام
شهور و سنين
وبنرجع لنفس الاماكن
قلوبنا مليانه لهفه
وشوق و حنين
نفسنا نشوف كل الوشوش
بنلقا الملامح متغيره
بقوا كبار....
الي كانوا من كام سنه
عيال صغيره
بس في نظرنا
حيفضلوا بردو صغيرين
وتقابلك عنين .. فاكرهم
عارفهم ... حافظهم
اصلك في كل ليله
كنت بتحلم بيها
باول نظره بينك وبينها
بلحظة ما ايدك حضنت ايديها
اتواعدتم انكم مش مفارقين
و في لحظه اللقا
كل سنين الغربه بتتنسي
بنفتكر اننا خلاص
من حقنا نمسح دموع الفراق
وبعد البعاد
حنقدر نرجًع كل لحظه
عدت علينا
عيشناها بعيد
وفجأه نكتشف
اننا مش قادرين
نقرب
نلمس ايدينا
بقينا بنسلم
بس بعنينا
ونلاقي نفسنا لسه متغربين
اصل غربتنا
مش غربة اماكن
غربتنا في القلوب
بقت محفوره
ومن كل وعود العاشقين
وعد واحد
خطوطه جوانا
مقدرش يمسحها الفراق
ان مهما الايام تفوت
ذكريات نظرة الحنين
ولمسة اللهفه
ووقت البعاد صوت الانين
مش حتموت
وحتفضل قلوبنا لأخر العمر
متغربين
