حوار قصير دمه خفيف ولكن............
يحتوي بين سطوره الكثير من المعاني بس مين يفهم
تلتقي في الصباح بأحد الأصدقاء
عادي فين الجديد في كده
المهم و بلاش لماضة
السؤال التقليدي " عامل ايه؟!"
و الاجابة التقليدية " الحمد لله ماشية"
الرد الغير طبيعي يأتي
"يااااااااااه ماشيه ايه بس...بعد كل الزأ ده و لسه ماشية...؛دي لو كانت بتمشي جوه الجزمه الاول كانت وصلت"
حد فهم حاجة؟؟؟؟؟؟
انا عن نفسي وقفت مذهول للحظات...
وبعدين فكرت و تساءلت
هو فين الزأ؟ هو احنا فعلا بنزؤ ولا بنتزأ؟؟
هو احنا الي ممشينها ولا هي الي ممشيانه؟؟؟
بس على فكرة انا ما جوبتش على اي سؤال من دول
يا ترى فيه حد حيجاوب!!!
يحتوي بين سطوره الكثير من المعاني بس مين يفهم
تلتقي في الصباح بأحد الأصدقاء
عادي فين الجديد في كده
المهم و بلاش لماضة
السؤال التقليدي " عامل ايه؟!"
و الاجابة التقليدية " الحمد لله ماشية"
الرد الغير طبيعي يأتي
"يااااااااااه ماشيه ايه بس...بعد كل الزأ ده و لسه ماشية...؛دي لو كانت بتمشي جوه الجزمه الاول كانت وصلت"
حد فهم حاجة؟؟؟؟؟؟
انا عن نفسي وقفت مذهول للحظات...
وبعدين فكرت و تساءلت
هو فين الزأ؟ هو احنا فعلا بنزؤ ولا بنتزأ؟؟
هو احنا الي ممشينها ولا هي الي ممشيانه؟؟؟
بس على فكرة انا ما جوبتش على اي سؤال من دول
يا ترى فيه حد حيجاوب!!!
هناك 10 تعليقات:
أيــــــــــوووووووووووووه
إيه الاختفاااااااااااااء ده كله ؟؟؟؟؟
حمدالله على السلامة و كل سنةوإنت طيب يا رب
البوست بيفكرني بالبوست بتاعي..أنا عروسة
أنا كمان محتارة حيرتك دي...مش عارفة..هي ليه مش بتمشي ؟؟؟؟؟
ليه دايمة واقفة ؟؟
فعلا لو هي ماشية جوه الجزمة..كان زمانها وصلت من زماااان...زمان أوي أوي
إحنا بنزق ؟؟؟؟
آه بنزق...و حيلنا بيتهد..بس الظاهر إنها عايزة هركليس أو يمكن زينة
دنيا غروووووووووورة...مالهاش أمااااان
بس عارف....إحنا بنزق في مكاننا...ونتزحلق..ونقع...ونفضل مكاننا...يمكن بيتهيألنا إنها ماشية..وهي مستعبطانا وواقفة..في مكانها
تسلم إيدك يا بندق..بوست لطيف..بس بيوجع قوي
تحياتي
اهلا اهلا بالاخت بنورة
والله كلامك لما بتقولي احنا بنزق و لكن واقفين في مكانا فكرني بالنكته بتاعت المساطيل الي قرروا يسرقوا عمارة وقفوا قدام العمارة و خلعوا القمصان و رموهم على الرصيف و قعدو يزقزا في العمارة ؛ عدى من وراهم حرامي غسيل اخد القمصان و جرى ؛ واحد من المساطيل بص وراه ملقاش القمصان رح مبطل زق و قال يااااااااااااااااااااااااه دحنا بعدنا قوي!!!!!!!
:))))))))))))))))
شكلها كده محتاجه حجرين عشان نفتكر اننا بعدنا عن مكننا.
hehehehehehehehehehe
ahamm 7aga ennohom shewayet masateeel
mesh sa3aida : P : P : P
صباح الخير يابندق
الساعه تقريبا 10:30 صباحا هنا وقبل مااخرج اقضي مشاويري فكرت اشوف مدونتك بسرعه، لكن طبعا علشان مافيش حاجه فـ حياتي بسرعه (الجزمه دابت ومافيش فلوس اشتري غيرها)، شمرت اكمامي وقررت اكتب لك رد ...سريع... قبل مااخرج
-------------
انا عن نفسي وقفت مذهول للحظات...
-------------
كنت متأكده إن موش إنت اللي قلت الكلام ده، وجملتك (أعلاه) زادت تأكيدي
أغلب الأحيان -لو ماكنش دايما- من الصعب إني أفصل نظرتي للأمور عن عقيدتي، حبيت إنك تعرف كده من البدايه علشان كلامي يكون في ضوء واضح
أما بعد،
هي مين اللي ماشيه؟ الحياه؟؟؟؟ وإيه موضوع الجزمه ده؟
الأخ اللي قال الكلام التعبان ده من الواضح إنه موش فاهم إن الـ إحم.... الجزمه موش بتمشي من غير قدم داخلها توجهها وتقود سرعتها، يعني اللوم على صاحب الجزمه يافندم
وبعدين يابندق الحياه ماهي إلا مجرد وعاء.... تصب فيه سرعه تصبح الحياه طياره كونكورد، تصب فيه(الوعاء) طين، يصبح ياإما وعاء مِطَيِّن، أو مكان ظريف نزرع فيه كام بذره والبذور يكبروا وصبحوا ورود تنتشى بها روح الناظر (لا موش ناظر مدرسه، ناظر يعني إسم فاعل من نَظَرَ) إليها
-------------
أما عن سؤالك: هو فين الزأ
-------------
علشان أنا متفائله، أقول لك إن كل يوم، لو ماكنش كل ساعه أو أقل، بنزؤ...ده اللي إسمه السعي...للرزق، ولتهديه مواقف تحرق الدم وتخلي اللسان يفلت، ولرسم بسمه على وجه حزين واحنا بنبكي من جوانا، ولتشجيع اولادنا ودفعهم للأمام واحنا موش قادرين نشوف فـ لحظتها (احيانا) إن بكره جاي ومعاه أمل جديد يدينا سبب نعيش علشانه، إلخ، إلخ
-------------
نيجي بقى لسؤالك: هو احنا الي ممشينها ولا هي الي ممشيانه؟؟؟
-------------
هنا بقى وجهات النظر حاتختلف.... تسأل شخص الدنيا ضلمه ف وشه-علشان موش شايف إلا نفسه فـ مرايه ورأيه إن الدنيا بما فيها لازم تكون تحت رجليه (زي الجزمه)، والدينا رغم إنها سُفْلَى(بـ ضم السين، سكون الفاء، وفتح اللام) إلا إنها تتعالى على أمثاله، يقول لك إن هي اللي ممشيانا، وهي بنت ستين فـ سبعين
ومايصدق إنه إتسأل وماتشفش نهايه لمهاتراته
تسأل إللى اتعودوا يرددوا كلام بدون حتى مايفهموه: يقولوا لك: الحمدولاه (فكر فيها كده بعد ماتشيل لام الوصل! تتكتب وتتنطق إزاااااي)...تسأل الغلابه اللي زيك وزيي، يقولوا لك إن الآيات 155-157 من سورة البقره بـ تشرح صدورهم وتخلى الدنيا بيهم طايره
واهي ماشيه! :)
--------------------
وكل يوم وانت بخير ودايما في أمان الله ورعايته
إيـــــمـــــان
اولا احب ارحب بيكي يا ايمان بتغيبي علينا كتير...يا رب تكوني بخير
اما بعد
ايييييييييييييييييييييييييييه فييييي ايييييييييه
ايه الخناقة دي
بصي انا مش عارف المفروض اكون سعيد بردك ولا افهم منه انك مش عاجبك الكلام
عموما انا سعيد اصلا بمشركتك و كونك اخدتي من وقتك و كتبتي الرد المحترم ده كله فهذا يدل على ان الموضوع مهم بالرغم من ان الكلام مش عجبك
انت وجهة نظرك عمييييقة و الغريب انه في لحظات حسيت بالتفاؤل في كلامك و فجأه تصبي عليا كمية تشاؤم محترمة
انا وجهة نظري بقى في الموضوع كله انه يعتمد على احساس الشخص الي بيتكلم يعني انت نفسك انا حسيت و لنت بتكتبي لحظة بتكوني متفائلة و بترفضي اي تشاؤم و لحظة بتكوني متشائمة و شايفة ان الدنيا مش تمام.
عموما انا سعيد بوجودك معانا و ربنا يرزقك و تشتري جزمة بدل الي دابت .
أخونا السكندرى ( الجيهه)..بندق هل لك علاقه بمطاعم بندق اللى فى سموحه؟...سؤال عارض ملوش أى لزمه سوى انى أعرفك انى كمان سكندرى ..أما عن التساؤل بتاعك هنا
الكلام ده على فكره لو تبص له بتعمق تلاقيه عميق جدا ...هل تذكر الحجار كان له أغنيه فى أحد المسلسلات التليفيزيونيه بيتساءل فيها " هو احنا اللى بنعيش الحياه ...والا هى اللى بتعيشنا "فكر فيها كده حاتلاقى معنى عميق جدا
تحياتى وابقى اتفضل عندنا
اهلا اهلا بماكس بتاع زمان
نورت المحكمة
هههههههه
قصدي نورت البلوج
واضح ان اسكندرية و السكندريين لييهم نفس المشاعر و الآراء المتقاربة
فعلا المعني قد يكون فعلا عميق و زي ما رديت على ايمان قبل كده
العملية حتعتمد على حالت الي بيقرأ
على فكرة انا زرتك و سيبتلك تعليق كمان.
لو عندك وقت ابقى بص بصة سريعة على باقي المخطوطات و قلي رأيك
السلام عليكم
والله حاجه جميلة جدا اني الاقي ناس جديدة عندي في البلوج و كمان تبدي اعجابها بما اكتب
انا مش عارف اشكركم ازاي
الاستاذ او الاستاذة S فعلا فرحت لما قريت التعليق
و انا رايح ازور المدونة المذكورة
اتمنى اني اتشرف بالزيارة دي دايما و يا ريت لو في وقت عندك لقراءة باقي الكتابات
شكرا جزيلا
هو ساعات بتزأ و ساعات انا بزؤها و ساعات بنبقى واقفين ده الاغلب اعتقد
تحياتى
لا هي حاجه تحير فعلا
بس في اعتقادي ان هي اللي مشيانا
احنا دمي ماريونيت يمسك القدر بخيوطها و يحركها كيف يشاء
تحياتي ليك يا برنس
رامي..قصاصة ورق
إرسال تعليق