مش غش

مش كل وجع
ممكن يبان في الوش
كتير بنخبي وجعنا
ونرسم ضحكه
نملا بيها الوش
يا ترى ده يبقا غش؟؟
مش القصد نكدب
على الناس
كل الحكاية
انه بيكون احساس
ميتوصفش
بيتحفر في القلب
بيحرقه..
زي ما بتحرق
شوية قش
وبنقعد بيه ساكتين
في ملكوته..
سارحين
ميطلعش مننا ولا صوت
غير شوية نهنهه
نكتمها جوا القلب
حتى لو حنموت
تفضل عنينا
محجرين
ناشفين
اصل..
مش كل الدموع
بتبقا من العين
في قلوب بتدمع
بحرقه
لو اتحست
تبكي الف والف عين
بس مخبيين
ونرجع نقول
مش كل الوجع بيبان
في الوش
واذا كنا بنضحك
و احنا موجوعين
ده متسماش
غش