البداية

مع كل دقة قلب
حته من العمر...
بتعدي
ثانيه وراها ثانيه
ولا فيش ثانيه...
بتهدي
نقابل وشوش
نحب و نتواعد
تتشابك طرق
وطرق تانيه...
تتباعد
عيون بتضحك
تاخدنا في حضنها
وعيون تايهه
بتدور على عمر
ضاع منها
ويوم ورا يوم
بتقرب النهايه
و نسال نفسنا
كانت امتى البدايه
نفتح شبابيك الذكريات
ندور وسط الصور
تتملا قلوبنا حنين
لوقت عدى وفات
عشناه قريبين
من قلوب عننا تاهت
في زحمة السنين
وفضلت اقلب في الصور
ملاقتش ولا صوره ليكي
اصلي عمري محتجت صورتك
دايما كنت فاكرك
حافظ ملامحك
كل حركاتك
حتى لفتاتك
و همسة عنيكي
فاكر لما كنت بحضنك
لما بتكوني وحشاني
بس مش دايما الحضن
بيكون عشانك
كتير كنت بحضنك عشاني
كنت بستخبى جواكي
من حجات كتير وجعاني
فاكر حنيتك
و فاكر دقة قلبك
الي فضلت سامعها
حتى بعد ما مشيتي
ورجع العمر يعدي
منستش لمسة ايديكي
في اخر سلام بينا
و انت بتقوليلي
حفضل حبيبتك
مهما الثواني مرت
وجريت سنين و عدت
حفضل جوا قلبك
وشم
واي حب بعدي
صدقني حيبقا
وهم
انا اول نبضك
انا اول حبك
انا بدايتك