طعم الرجوع مر

طعم الرجوع مر
يمكن اكتر من السفر
والليل بقسوته بيمر
مهما غاب 
ضوء القمر
بنهرب و نبعد
عن الاماكن 
عن الوشوش
بنغمض و ندعي
ان في يوم
العيون ميتلاقوش
ويدق الاشتياق جوا القلوب
وفي ذكرياتنا بنغرق
ونحضن ريحة الطوب
الي كان شاهد
على نبض ايامنا سوا
قبل ما نتوه في الدروب
نرجع نكلم نفس الحيطان
ونسمع لسكوتنا صدى
ريحة البكا ماليه المكان
ورجوعنا للوحده قضا
نفتح ببان و نقفل ببان
والقلب جواه فضا
تنزل دموعنا
لما سألنا امتى
تضحك لينا الليالي
و نلمس بادينا
احلامنا؟
لا الليل ضحك
ولا لقينا دوا
لأوجعنا
ورفعنا ايدينا بالدعا
لما اتكسرت من الهموم
ضلوعنا
وعشان نعيش
على نفسنا ضحكنا و قلنا
يمكن في يوم نحب
و تملا الضحكة قلوبنا
يمكن دنيتنا تحن
ونلقا وسط الحزن
حضن...
يضم جواه عيونا
يمسح منها الشجن
ويطبطب على دموعنا
يمكن حيجي اليوم
الي قلوبنا تلقا فيه الدفا
تلقا فيه السكن
و نغمض و نحلم
و نصحا جوا الحلم
بقلوب ملاها الوفا
يمكن ...